Errenteria-Orereta arpilatu zutela 43 urte bete dira gaur
Ero moduan sartu ziren Errenteria-Oreretara. Bazterrak nahastu, saltokietan lapurtu, erakusleihoak lehertu, balkoi eta leihoetara tiro egin, atarietan pisa eta kaka egin... Argazki iluna utzi zuten Espainiako Estatuko 200 poliziatik gora udalerrian, beste behin ere, duela 43 urteko uztailaren 13an.
Poliziak, Teo gozotegian lapurtzen. Ero moduan sartu ziren Errenteria-Oreretara. Bazterrak nahastu, saltokietan lapurtu, erakusleihoak lehertu, balkoi eta leihoetara tiro egin, atarietan pisa eta kaka egin… Argazki iluna utzi zuten Espainiako Estatuko 200 poliziatik gora udalerrian, beste behin ere, duela 43 urteko uztailaren 13an.
Greba orokorrean murgilduta dago herria. German Rodriguez hil zuten Iruñean Espainiako Poliziek eta bi egun geroago Joseba Barandiaran Donostian; bi gazte hiru egunean hil dituzte. Beraun auzoko bi bizilagun balaz zauritu ditu poliziak, eta beste asko eta asko kolpatu; greba orokorrarekin jarraitzea erabaki du asanbladak. Haserrea eta amorrua da nagusi Errenteria-Oreretako kaleetan, Euskal Herriko beste askotan bezala, lantegiak eta komertzioak itxita, eta jendea kalean.
Testuinguru horretan, jendea kalean manifestazioan zegoela heldu dira antidisturbioen hogei furgoneta edo autobus, Kaputxinoetako tuneletik barrena, herrira. Basati aritu dira. Miranda de Ebrotik (Burgos) heldutako Espainiako Poliziaren erreserba konpainiakoak dira.
Garaiko egunkarien azaletara eta telebistako informatiboetara eraman dute Errenteria-Orereta, bolo-bolo dabilen irudiagatik: Espainiako Polizia Zumardian zen Teo gozotegiko erakusleihoa txikitu, pastelak lapurtu eta jaten azaltzen da.
Denbora pasa izanak ez du argazki hura ezabatu, ezta gertaera latz eta gordinak ere. Herriari lapurtzera heldu ziren, herria arpilatzera, eta irudi hori betirako geldituko da herriaren memorian.
