'Lanera bizikletan' bigarren fasean sartuko da; ABB-Niessen aukeratu dute
35 enpresek eta 96 langilek hartu dute parte lehen fasean. ABB-Niessen hautatu dute baldintza guztiak betetzen dituelako; bizikleta aparkalekua jarriko dute hor.
'Lanera bizikletan' egitasmoan parte hartzen duten Oarsoaldeko eragileak. Lanera bizikletan egitasmoa bigarren fasean sartu dela iragarri dute gaur. Pasa den irailean hasi zen mugikortasuna sustatzen duen proiektua.
35 enpresek eta 96 pertsonek hartu dute parte analisia egiten. Azterketa horren helburua zen bizikletaren erabilera eta egoera zein den Oarsoaldean. Industriaguneetara joateko bideak aztertu dituzte, baita eremu horien barrukoak ere. 26 industriagune aztertu dituzte guztira.
Horrez gain, eskualdeko langileen iritzia jaso dute, lantokira bizikletan joateari buruz. Modu horretan joateko dituzten erraztasun eta zailtasunei buruz galdetu diete, baita bizikleta garraiobide bezala erabiltzeko dituzten baldintzei buruz ere.
ABB-Niesen eta Don Bosco
Behin diagnosia eginda, ABB-Niessen enpresa hautatu dute zuzeneko lankidetzan aritzeko. Modu horretan, langileak bere lantokietara pedalei eraginda joatea sustatu nahi dute.
“ABB–Niessen enpresa hautatu dute baldintza guztiak betetzen dituelako, hala nola iraganean mugikortasun jasangarriko ekintzak egin izana eta Foru Aldundiarena den bidegorri baten inguruan egotea, Arditurriko bidegorriaren inguruan”, adierazi dute Lanera bizikletan egitasmoaren sustatzaileek.
Don Bosco ikastetxeko ikasleek sortutako aparkalekua jarriko dute ABB-Niessenen. Rafael Romero Mugikortasun diputatuaren aitortza jaso dute, egindako lanagatik. “Iraunkortasun, ekitate eta eraginkortasunarekiko” izan duten atxikimendua txalotu du Romerok.
“Asko aurreratu dugu”
Gipuzkoako Foru Aldundiko Mugikortasuneko zuzendari Ander Iturriren iritziz, gaur aurkeztu diren datuek erakusten dute “asko aurreratu” dela mugikortasun jasangarrian. Hala ere, oraindik bide luzea egiteko dagoela gaineratu du, eta erakundeek bidegorriak hobetzen jarraitu behar dutela.
Diagnosiko hainbat datu eman dituzte:
- Inkestari erantzun diotenen % 46,7k bizikleta erabili du noizbait lantokira joateko.
- % 73,3k gutxiago kutsatzen duten eta osasungarriagoak diren garraiobideak erabiliko lituzke autoaren edo motoaren ordez. % 17,3k aukera hori planteatuko luke.
- Inkestari erantzun diotenen % 80k adierazi duen desabantaila nagusia da joan-etorrietan denbora gehiago behar dela eta bizikletaz joateko azpiegitura segururik ez dagoela.
- % 15ek argudiatzen du bizikletak gordetzeko leku segururik ez dagoela. Txirrindulariei ematen zaizkien zerbitzuen barruan, % 20k baino ez ditu eskaintzen bizikleta aparkaleku seguruak eta dutxadun aldagelak.
