Errenta aitorpena euskaraz egiteagatik, sariak
Oarsoaldean ogasunaren aurrekoak euskaraz egin dituztenek jada jaso dituzte zozketan esleitu dizkieten sariak. Herri bakoitzeko bat eman dute.
Oarsoaldeko Euskara Batzordeak —bertan ordezkaritza dute eskualdeko lau udalek— jakinarazi ditu 2020. urteko errenta aitorpena euskaraz egiteagatik sariak jaso dituztenen izen-abizenak. Jasotako hautagai guztien artean, herriz herrikako zozketak egin zituzten hilaren 7an, San Fermin Egunarekin bat. Beraz, euskaraz aitorpena egin eta horren egiaztagiria entregatzeagatik bi lagunentzako otordu bana jaso dituzte lau irabazleek, Oarsoaldeko herri bakoitzeko bana, alegia.
Errenteria-Oreretako irabazlea Imanol Miner Aristizabal izan da. Hark Gaztelu jatetxean otordu paregabeaz gozatzeko aukera izango du. Sari emate ekitaldian Errenteriako Hizkuntza Berdintasunerako zinegotzi Itziar Ostolaza eta Gaztekuko sukaldari Aritz Ertzibengoa izan zituen alboan.
Errenteria-Oreretako irabazle Imanol Miner (erdian), Gazteluko Aritz Ertzibengoaren eta Hizkuntza Berdintasuneko zinegotzi Itziar Ostolareneskutik saria jasotzen.
Lezoko irabazleak Kaialde jatetxean ederki jateko aukera irabazi du: Josu Maritxalar Elorza da. Albiste honekin doazen argazkietan haren emazte Aitziber Otaño ageri da, Ion Pombar Lezoko Udaleko Euskara zinegotziaren eskutik zorioneko bonua jasotzen.
Lezoko irabazle Josu Maritxalar da, baina haren emazte Aitziber Otañok jaso zuen saria Ion Pombar Euskara zinegotziaren eskutik.
Pasaian, berriz, Luziano Ollokiegi Eizagirre zergaduna izan da zozketaren garaile. Donibaneko Ontziolan bapo jateko eskubidea lortu du, beraz. Sari emate ekitaldian RKA aholkularitza etxeko Maria Badiolarekin eta Euskara zinegotzi Loreto Osarekin ageri da. Pozik, nola ez.
Ezkerrean, Pasaiako irabazlea: Luziano Ollokiegi Eizagirre. Haren ondoan daude Loreto Osa Euskara zinegotzia (erdian) eta RKA aholkularitza etxeko Maria Badiola.
Iosune Cousillas. Hura Oiartzungo irabazlea. Eta gastronomia grina asetzeko areto Esnoiz jatetxea izango du. Albiste honetako irudian ageri denez, Josu Delgado Euskara zinegotziak eman zion saria.
Oiartzungo sari ematearen irudia da honakoa: Iosune Cousillasek jaso zuen Josu Delgado Euskara zinegotziak emandako saria.
