Eguzkiaren energia doako elektrizitate bihurtzera deitu du Iratzerrik
Doakoa eta ekologikoa den alternatiba gisa aurkeztu dute autokontsumo fotovoltaikoa. Hausnarketarako hainbat galdera ere jarri dituzte mahaigainean.
Eguzkiaren energia doako elektrizitate bihurtzeko aukeraren berri eman du Iratzerri taldeak, autokontsumo fotovoltaikoa aurkeztuz. Eguerdian, eguzkia gorenean dagoenean, elektrizitatearen prezioak ere goia jotzen duela azaldu dute. Hori dela eta, 2.TD tarifa elektriko berriak jarri dituzte mahai gainean, “geure energia ekoitzi eta auto-kontsumitzeko”.
Energia elektrikoa %100 doan %100 ekologikoa eta ia mantenu lanik ia behar ez duela azaldu dute. Are gehiago: “instalatzeko diru-laguntzak eta amortizazio-epeak geroz eta laburragoak dira”.
Lezoarrei hainbat galdera egin nahi izan dizkiete euren energia kontsumoaren gainean hausnar dezaten, eta eskua luzatu diete zalantzarik izango balute haiekin harremanetan jar daitezen posta elektroniko bidez edo galdera-erantzunak Sagar Zulo, Iriarte-Enea eta Tiñelun utziz.
Honakoak dira taldeak bizilagunei planteatu dizkien galdekizunak:
- Espero zenuena baino okerragoa izan al da azken faktura? Zeozer egitea, ekintzara pasatzea pentsatzen al duzu?
- Amaierako merkaturatze-prezioak elektrika handiek kontrolatzen dituztela uste duzu?
- Merkatu elektrikoa benetan Gobernuak arautu beharko lukeela uste duzu?
- Ezagutzen dituzu autokontsumorako instalazio fotovoltaikoen bertuteak? Hitzaldi edo tailer batetan parte hartuko al zenuke?
- Ba al dakizu honako instalazio baten bataz besteko prezioa?
- Panel fotovoltaikoak taldean erosteko aukera interesgarria iruditzen zaizu?
