[Galeria] Beste urte batez HiruBinaka arrakastatsua ospatu dute
HiruBinakak 'BiBinaka' izaera hartu du pandemiaren azken orduko eraginez. Jendetza bildu da kultura segurua kontsumitzera.
Lohizune Telletxeak eta Luix Mitxelenak performance bat eskaini dute antzeztuz eta dantzatuz. Asteburuaren atarian, giroa egon da Kulturabirusaren baitan. HiruBinaka dinamikaz gozatu ahal izan dute gerturatu direnek.
HiruBinaka izenburuak dioen bezala, hiru ekitaldi eta bi artista dira emanaldi bakoitzeko. Baina pandemiaren eraginez, bertan behera geratu da Karen Muñozek eta Alain Mendizabalek egin behar zuten emanaldia.
Iaz atera zuten kalera proposamen hau, eszenatokiak herriko hiru txokoetan zeudelarik. Aurten, eliza atzean eta Arizmendi-enean izan dira ekitaldiak, taula txandakatuz eta emanaldi bakoitzari 20 minutu denbora eskainiz.
Lehenik, Lohizune Telletxeak eta Luix Mitxelenak, psikologoaren eta pazientearen rolak hartu, eta paziente gazteak sexuarekin duen harremanaz egin dute hausnarketa. Osotasunean, performance bat izan da, Mitxelenak dantzatu ere egin baitu.
Bigarren emanaldiak arpa eta dantza uztartu ditu, Alaia Belaunzaran musikariaren eta Olarri Dantza Taldeko dantzarien eskutik. Euskal dantzaz disfrutatu dute ikusleek, arpa soinu jartzaile gisa. Belaunzaranek bakarka ere jo ditu hainbat abesti.
