Xarmaz betetako erakusketa, alfonbra gorri eta guzti
Film zehatz baterako sortu eta modaren historian betirako geratu diren hamar jantziren inguruan erakusketa antolatu du Jantziaren Zentroak. Irail bukaera arte bisita daiteke, doan.
Ainhoa Mendiburu erakusketako jantzien artean. Xarmagarrietan xarmagarriena. Halakoa da Jantziaren Zentroak bere beheko solairuan ondu duen erakusketa. Glamourez betetako film sonatuenen hamar soinen erreplikak bildu dituzte, hasiera batean irail bukaera arte zabalik izango den erakusketan. Iaz Icon erakusketa antolatu zuten euren ustez modaren historiaren hamar diseinatzaile handienen traje ikonikoenak kopiatuta.
Hari horretatik tiraka heldu da oraingo hau, Ainhoa Mendiburu Jantziaren Zentroko arduradunak azaldu duenez. «Zinemara jauzi egitea erabaki genuen. Zinemako historian ikur bilakatu diren hamar jantzi aukeratu, kopiak egin eta erakustea erabaki dugu». Horietako hiruk, gainera, jantzirik onenenaren Oscar saria jaso zuten. Hamar jantzi, bederatzi diseinatzaile eta hamarnaka anekdota batu dituzte erakusketara; bederatzi horietatik hiru emakume, eta Oscar saria jaso duten hiru jantzietatik bi, emakumeek egindakoak dira. Diseinatzaile bat Erresuma Batukoa, bi Frantziakoak, eta gainontzekoak Ameriketako Estatu Batuetakoak dira.
Jantziei baino gehiago, ezagunak izan ez ziren diseinatzaileei aitortza da Mendiburuk azaldu duenez: «Diseinatzaile horiek zeintzuk ziren, zinema munduan egindako lana, sortutako jantziak, eta modaren historian izan zuten eragina zabaltzea da helburua».
Jantziaren kopiaren ondoan txarteltxoa jarri dute, horien deskripzioarekin zein diseinatzailearen izen-abizen eta berezitasunekin. Bitxikeriren bat ere kontatu du Mendiburuk; hala, erakusketara bildutakoen artean garestien saldu zena Marilyn Monroeren soineko zuria izan zela. Anekdota mordoa dituzte eta horiek, iraileko asteburuetan antolatuko dituzten doako bisita gidatuetan ezagutzeko aukera izango da. Hitzordua eskatu beharko da abuztu bukaeratik aurrera, Turismo Bulegoko 943 49 45 21ra deituta, edota jantziarenzentroa@errenteria.eus postara mezua idatzita.
Ramon Garciak josi ditu jantzi guztiak, mimo handiz, eta hori argi gelditzen da emaitzan. Erakusketa benetan ederra lortu dute. Pasa den urrian hasi zen lanean, eta apirilean bukatu zuen jantziak josten. German Nestaresen laguntzarekin egin du Garciak lan guztia. Mendiburuk egin ditu testuak eta bisita gidatuetarako gidoiak.
Ikusleak izar bihurtuko dira
Konplexuena josteko, Pretty Woman-ena izan dela dio Mendiburuk. «Ramonek [Garcia] hala dio, tolestura mordoa ditu eta hori izan omen da gehien kostatu zaiona». Bestaldean, errazena, Ozeko Aztiaren jantzia. Erakusketa biribiltzeko, 11. jantzia ere txertatu dute, alfonbra gorri gainean. Jendeak soinekoaren atzean jarrita Hollywoodeko izarren antzera egin dezake argazkia, «ikaragarrizko arrakasta izaten ari da». Beste sekretu guztiak, erakusketara joaten direnek ezagutuko dituzte.
Erakusketa doakoa da eta larunbatetan 11:00etatik 14:00etara eta 17:00etatik 20:00etara, eta igande eta jaiegunetan 12:00etatik 14:00etara bisita daiteke.
