Trantsiziozko asteburua Pasaiako traineruentzat
Banderarik ez da iritsi, baina traineru guztiek esperotako mailari eutsi egin diote. San Pedro ibili da garaipenetik gertuen.
'Erreka', atzoko Orioko estropadan. Argazkia: Josu Z. Pasaiako traineruek gora-behera gutxiko asteburua izan dute pasa dena. Banderarik ez da izan, baina traineru bakoitzak gutxi gorabehera dagokion lana egin du, emaitzek sasoia ematen ari denarekin koherentzia izan dute.
KAE1en, larunbateko Zumaiako estropada irabaztear izan zen San Pedro. Atzo, berriz, hirugarren izan ziren moreak Oriokoan, Pedreñaren eta Kaikuren atzetik. San Juan, berriz, bosgarren izan zen larunbatean Zumaian eta seigarren atzo Orion. Sailkapen nagusian hirugarren da Libia ontzia 10,53ko puntu koefizientearekin, eta seigarren Erreka 9,00koarekin. KAE1eko SAILKAPENAK HEMEN KLIK EGINDA IKUSI.
ETEn, erregulartasunari eutsi zioten Donibaneko Batelerek. Estropada bakarra izan dute asteburuan, larunbat arratsaldekoa Zumaian. Bertan laugarren izan ziren 11:00ko denborarekin; Tolosaldea irabazleak 10:51 egin zuen, Hibaika bigarrenak 10:57, eta Deusto hirugarrenak 10:58. Horrek esan nahi du aurre-aurretik ez dabiltzala urrun sanjuandarrak, eta beharbada egunen batean sorpresaren bat emateko gai izango dira. ETEko sailkapen orokorrean bosgarren da Batelerak ontzia, 7,25eko puntu koefizientearekin. ETEko SAILKAPENAK HEMEN KLIK EGINDA IKUSI.
KAE2n, berriz, berritasuna: Trintxerpe-Illunbek azken postutik ihes egin zuen sasoian lehenengoz atzoko Portugaleteko estropadan. Donostiarrak arazoren bat eduki zuen, eta horrek ahalbideratu zuen trintxerpetarren aurrera urratsa. KAE2ko SAIKAPENAK HEMEN KLIK EGINDA IKUSI.
