Ikusleak ez zituzten epel utzi
Bertso saio bikaina atzo Alaia Martinek, Amets Arzallusek, Aitor Sarriegik eta Beñat Gaztelumendik eskaini zutena. Lau Haizetara Euskaltzaleon Topagunearen lan eskergari aitortza bilakatu zen saioa.
Arzallus,Martin, Sarriegi eta Gaztelumendiren bertso saioa atzo. Bertso saio ederra atzo Amets Arzallus, Alaia Martin, Aitor Sarriegik eta Beñat Gaztelumendik eskaini zutena. Lau Haizetara Euskaltzaleon Topagunearen eskutik heldu zen, eta Koldo Mitxelena ikastetxearen jolastoki estaliak hartu zuen. Gai bakarra izan zuten hizpide lau bertsolariek gai jartzaileak hala aginduta, Lau Haizetara Euskaltzaleon Topagunea, eta barnebiltzen dituen proiektuak eta iniziatibak; horien gainean aritu ziren: kuadrillategi, Saretuz whtsapp taldea, Kantu jira, Mintzalaguna, Familian jolasean,… Ondo aritu ziren batera eta bestera moldatzen bertsolariak. Egunean Behin lasterketako hamar galderak ere erantzun behar izan zituzten bertsolariek, eta txalometroak Martini eman zion ikusleen saria.
Arzallusek eta Martinek, Kuadrillategiko begirale bihurtu ziren, eta proiektuan baztertuta dabilen gaztetxoaren egoerari zein alternatiba eskaini aritu ziren. Sarriegik dezenteko barreak eragin zituen kideen gabeziei erreparatuta Errigoraren katalogotik produktuak aholkatzen hasi zenean. Bat nabarmentzeagatik, Martini gomendatutako potxa potoa, bere itxura hain fina izanda. Eta fin, benetan, Martin ibili zen erantzunarekin, potxak jandakoan ere fin izaten jarraitzen duen zalantzarik ez baitzuen utzi.
Laurak bikain. Esker on mezua ikusleei, hondartza, mendira edota beste nonbaitera joan ordez, bertso saioa hautatu zutelako igande eguerdia pasatzeko.
