[Bideoa eta galeria] 2022koak erraldoiak izango dira
Ordu erdiko ikuskizuna da EMKE Musika Bandak eta Buruhandi eta Erraldoien Konpartsak ondu dutena. Gaur bi emanaldi egin dituzte eta 25ean, lau emanaldi izango dira. Guztietarako gonbidapenak agortuta daude.
Xanti eta Maialen dantzan Lekuona Fabrikan musika bandarekin. Aurten ere, bigarrenez, madalenak bertan behera gelditu dira. Zentenario usaina du egunak, eta pandemiak debekatutako agertokian entzuteko aukera izan da formatu txikian. Lekuona Fabrikak hartu du ikuskizuna, musika banda eta buruhandi eta erraldoien konpartsa bat eginda aritu dira agertokian publikoaren txaloek eta emozioak lagunduta, Jira bira dantzan. Txupinazoa ere irudikatu du publikoak
Lehen pieza, ezinbestean, Zentenarioa izan da, eta ondoren iritsi da diana. Publikoaren gozagarri buruhandiak dantzan, alai, jolasti beti moduan, eta Xanti eta Maialen pausu dotorean konpartsako kideek gidatuta.
Ekitaldiaren erdian mezuak. Hamaika aurpegi ezagun, eta galdera bat, Zer dira zuretzat Madalenak? Aizpea Otaegi alkatea, Luis Mari Moreno Pirata musikaria, Jon Maya dantzaria, Xabier Vesga txistularia… denen ahotik madalenen xarma, eta 2022koak ikaragarriak izango diren desioa.
Ordu erdiko ikuskizuna da EMKEren bandak eta Buruhandi eta Erraldoien Konpartsak ondu dutena. Gaur bi emanaldi egin dituzte eta 25ean, lau emanaldi izango dira. Guztietarako gonbidapenak agortuta daude.
Lan ederra osatu dutena, hunkigarria, goxoa. Amaieran, EMKEko Josu Mitxelenak hartu du hitza esateko bigarren urtez jarraian jairik ospatu gabe gelditu direla herritarrak. Ez kezkatzeko eskatu du, ordea. Izan ere, atzerako kontaketa hasi da gaur bertan 2022ko madalenetarako, eta horiek, bandaren presidentearen izenean, “erraldoiak izango dira”. Beste behin ere, Errenteria-Orereta herri bizia dela erakutsi du; ideia horri azpimarra jarri zion Mitxelenak, “bizia kulturalki, bizia herri gisa”.
Eskerrak eman dizkio Mitxelenak musika bandari, buruhandi eta erraldoien konpartsari, jai batzordeari, eta gaur, Lekuona Fabrikaren Sorlekua auditoriora gerturatu diren guztiei. “Gora madalenak!” oihuarekin bukatu du bere hitzartzea, publikoaren txalo artean.
