Kalea hartuko du memoria feministak
Murala margotuko dute larunbat honetan eta hurrengoan Zapirain Anaien kalean eta parte hartzera deitu dituzte herriko emakume guztiak; 10:00etatik 14:00etara eta 16:00etatik 19:00etara arituko dira.
Memoria feministaren murala margotuko dute datozen bi larunbatetan. Errenteria-Oreretako mugimendu feministak azken urte luzetan egindako lan handiari aitortza egin eta memoria feminista espazio publikora eraman nahi zuten. Horren harira, murala egitea otu zitzaien, bertara biltzeko memoria feminista hori. Proiektuaren atzean Berdintasun Kontseilua, Udala, eta Jane Gamon daude eta GeroArte kolektiboaren laguntzarekin ari dira.
Muralean zer eta nola irudikatu erabakitzeko bi saio egin zituzten aurretik, eta orain, jasotako ideia horiek guztiekin kalera atera eta horma zehatz bat memoria feministaz betetzen hasiko dira. Margoketa lanak Zapirain Anaien kalean egingo dituzte larunbat honetan eta hurrengoan, 10:00etatik 14:00etara eta 16:00etatik 19:00etara, eta parte hartzera deitu dituzte herriko emakume guztiak, “kalea irabaztea, memoria feminista espazio publikora eramatea, urrats bat gehiago delako”.
