Babes ofizialeko etxeak zozkatzeko oinarri berriak onartu dituzte
Irailaren 30 arte zabalik dago Velascoko babes ofizialetako etxeen zozketan izen emateko epea.
Belaskoko babes ofizialeko etxebizitzen zozketan izen emateko oinarriak onartu dituzte. San Pedroko Velasco eremuan eraikiko dituzten babes ofizialeko etxebizitzen oinarriak, indarrik gabe uztea onartu dute aho batez gaur izan den ohiko bilkuran. Izan ere, “akats teknikoak” medio, zuzenketak egin behar zirela adostu zuten udal talde guztiek ekainaren 14ko udalbatzan. Oinarriak zuzendu eta ekainaren 28ko Gipuzkoako aldizkarian argitaratu dituztela eman du jakitera Pasaiako Udalak, eta, beraz, gaur, oinarri berriak bozkatu dituzte.
Udal talde ia guztiak alde agertu dira, EH Bildu abstenitu egin da: “Oraingoan, ez dugu emendakinik aurkeztu, batez ere, gaia batzordera eraman genuelako berriz ere, eta batzordean erantzun zitzaigulako ez zela alde bozkatuko eta ez zela ezta galdetuko ere.” azaldu du Iraitz Pazos abertzaleak. EAJk EH Bilduri esan dio, erantzuna eman zietela bai mezu elektronikoz, bai batzordean.
Izen emateko epea irailaren 30 arte luzatu dute. Udalak zehaztu du, behin betiko zerrenda prest dagoenean, 39 etxebizitzen zozketa egingo dela Donibaneko kulturgunean. Deialdiaren datuak aldez aurretik aurkeztuko dituztela jakinarazi dute.
