Katakrak liburu dendari buruzko hitzaldiarekin hasiko da Kulturabirusa
Bost ekitaldi izango dira uztaileko azkeneko astean. Horiekin gozatzeko sarrerak eskuragarri daude turismo bulegoan (Arizmendienean).
Katakrak liburu denda ekonomia sozialean oinarrituta dago [Arg.: katakrak.net]. Uztaileko azken astea hasi berri da, eta Kulturabirusak bost ekitaldi dakartza aste honetarako. Lehenengoa bihar arratsaldean izango da.
Biyurri hitzaldiak zikloaren seigarren eta azkeneko hitzaldia egingo dute bihar arratsaldean. Juan Etxenikek Iruñeko Katakrak liburu denda kooperatibaren esperientziaren berri emango du, 19:00etan hasita, udaletxeko pleno aretoan. Katakrak. Liburu denda bat baino gehiago da hitzaldiaren izenburua.
Edukiera mugatua izango duenez, sarrerak turismo bulegoan edo Biyurrienearen sare sozialen bitartez harremanetan jarrita lor daitezke (Instagram eta Facebook).
HiruBinaka, ostiralean
Herriko sortzaileek sortutako formatu propioaren bigarren saioa egingo dute datorren ostiralean —hilak 30—. Lehenengoa hilaren 16an egin zuten.
Sortzaile bikote hauek plaza inguruan prestatutako hiru agertokietan arituko dira beraien lanak eskaintzen. Honakoak dira bikote horiek: Oreka TX eta Myriam Perez Cazabon; Malen Elizasu eta Xabier Belaunzaran; eta Idoia Beratarbide eta Maria Mendizabal.
30na pertsonako hiru taldetan banatuko dira ikusleak. Kasu honetan ere turismo bulegotik pasatu beharko dute sarreraren bila.
Larunbatean, hiru ekitaldi
Larunbatean egun mugitua izango da Oiartzunen. Sortzaile Azoka egingo dute, bi zatitan banatuta. Alde batetik, artisauek eta beste artegileek azoka egingo dute, 11:00etatik 14:00etara eta 16:30etik 19:00etara, eliza inguruan (eguraldi txarrarekin, Elizalde Herri Eskolako frontoian). Informazio gehiago aurki daiteke esteka honetan klik eginda.
18:00etan, berriz, Oiartzun urtekaria eta Mugarri bildumako aurtengo zenbakia aurkeztuko dituzte udaletxean. Sarrerak hartu beharko dira turismo bulegoan.
Eguna bukatzeko, Harri Beltza elkarteak antolatzen duen udako kontzertuaren txanda izango da. Muski & Uzi eta Lagunak arituko dira eliza inguruan, 19:30ean hasita. Euriarekin, Elizalden egingo dute. Sarrera edukiera bete arte izango da.
