Ulia inguruan dagoen 'sare fantasma' bat aterako dute gaur itsasotik
25-30 metroko sakoneran dagoen sare bat aterako dute gaur.
Duela gutxi, sare osoa ateratzen saiatu ziren Buceo Donostiako kideak. ‘Sare fantasma’ deritzon arrantzaleen sare bat aterako dute gaur Uliako itsas hondotik. Horretarako, Donosti Buceo, Eguzki, Guardia Zibilaren itsas zerbitzua eta AZTI ibiliko dira ateratze lanetan. Sarea 25-30 metroko sakoneran dagoela azaldu du Eguzki talde ekologistak.
Buceo Donostiak topatu zuen sarea, eta zati txiki bat ateratzea lortu zutela esplikatu du Eguzkik, baina donostiarrek ondorioztatu zuten, gainerakoa atera ahal izateko segurtasun berme handiagoak behar zituztela. Prozesu hau egiteko baliabide egokiak eta segurtasuna emateko legezko baimena, Guardia Zibilak dauka, eta beraz, elkarlana ezinbestekoa izango da.
Sare hauekiko kezka geroz eta handiagoa dela adierazi du Eguzkik, izan ere, FAOren arabera, urteko 640.000 tona arrantza arte amaitzen dira itsasoan: “Kontinentearen %46 sarez osatuta dago”. Ozeanoak plastikoz betetzeaz gain, nabigaziorako problema direla eman du jakitera Pasaiako itsasontzi museoak, faunarentzako tranpa hilgarriak direla ere gogorarazi du.
