Zilarrezko domina Pasaia Kayakentzat Espainiako txapelketan
Asier Bulman parakanoista gazteak, zilarrezko domina eskuratu zuen. Pasaia Kayakeko K-1, K-2 eta K-4 modalitateko ontzi guztiek hartu zuten parte.
Nuñez, Altuna, revuelta eta Herce bosgarren geratu ziren K-4 modalitatean. Trasonako urtegian (Asturias) jokatu da asteburuan haurren eta kadeteen mailako Espainiako abiadura txapelketa. Pasaia Kayakeko piraguistak bertan izan dira, eta talde guztietako K-1, K-2 eta K-4 ontziek hartu zuten parte. Nesken proba guztiek 500 metroko distantzia zuten, mutilenek, aldiz, 1000 metroko distantzia.
Asier Bulman parakanoistak KS1 modalitatean lehiatu zuen. Finalera sailkatu zen zuzenean eta zilarrezko domina lortu zuen pasaitarrak. Haurren mailan Espainiako txapelketa batean klubak lortu duen lehenengoa izan da.
Haurren A mailako kategorian, Irati Herce eta Kattalin Altunak jokatu zuten lehenik K-2 modalitatean. A finalera iritsi ziren ia-ia, azkenik B finalerako sailkatu ziren eta bosgarren postua lortu zuten. Ondoren, K-4 ontziarekin atera ziren, eta horretarako, Enara Nuñez eta Noa Revuelta batu zitzaizkien piraguara. A finalerako sailkatu zen laukotea, eta lehia estuaren ondoren, bosgarren izan ziren. Pasaia Kayakek adierazi du “meritu handiko postua” lortu zutela, izan ere, finalean egon ziren beste bi euskal talde bakarrenen aurretik geratu ziren.
