Klubeko hamalau jokalari eramateko saiakerak, haserrea piztu du Touringen
Sare sozialen bidez haserrea agerian utzi du Errenteria-Oreretako Touring futbol taldeak. Arrazoia, bere klubeko hamalau jokalari, denak neska eta emakumeak, eramateko saiakera izan da.
Fanderiako zelaiaren artxiboko irudi bat Sare sozialen bidez haserrea agerian utzi du Errenteria-Oreretako Touring futbol taldeak. Arrazoia, bere klubeko hamalau jokalari, denak neska eta emakumeak, eramateko saiakera izan da. Errespeturik ez izatea egotzi dio saiakera egin duen klubari, eta Touringen emakumeen egitura suntsitzeko arrisku larrian jarri izana leporatu. Maniobra horren atzean, Donostiako Antiguoko kluba dagoela ere jakinarazi du Errenteria-Oreretako futbol taldeak, eta gogor salatu ditu erabilitako moduak, eta errespetu falta.
Hamalau neska horietatik 2009koak dira hiru, 2008. urtekoak beste bost, eta Senior Mailakoak gainontzeko seiak.
Urteetako lan gogorraren ostean, futbolean aritu nahi duten neska eta emakumeei erantzun ahal izateko egitura sortua du Touringek, “orain, beste klub batek egindako kaptazio masiboak lan hori guztia suntsitu du ia”. Errespetua izan behar du oinarria Touringen ustez futbol kluben eta oro har kirol taldeen arteko harremanean, “eta hori ez da gertatu, kasu honetan, behintzat”. Halaber “gaitzetsi” egin du Touringek haurrak txikitatik bereganatzeko saiakera, “ingurune naturaletik bereiziz eta haurren ohiko ingurunea aldatuz”.
Sare sozialetan zabaldu duen oharraren bidez, Gipuzkoako iritzi publikoa jakinaren gainean jarri nahi duela azaldu du Touringek, eta bide batez, deia egin die erakundeei, Foru Aldundi, futbol federazio, eta adin txikietan kirolean jardunbide egokien funtzionamendua sustatzen dutenei, “horrelako jokabideekin amaitzeko neurriak har ditzaten, eta din horretako jokalarien joan etorriak arau ditzaten”.
Hamazazpi talde ari dira une honetantxe Touring Futbol Taldean; lau emakume kategorietakoak dira, eta ia 500 gazte eta ez hain gazte ari dira entrenatzen egunero Fanderian”.
Touringek futbola sustatzeko lanean jarraitzeko konpromisoa berretsi du amaitzeko, “integrazioa eta nberdintasunean oinarritutako prestakuntza helburuak lortzeari lehentasuna emanez; gure ustez, helburu horiek, kirol garaipen bat baino garrantzitsuagoak baitira”.
