Makarenak, jai eredu alternatiboa eta kultura itzal ez daitezen
Gaurtik hasi eta igande arratsera arte Makarenek hartuko dute Lino Gunea OaingozHau mugimenduaren eskutik.
Mirari Martiarena eta Idoia Torregarai bihar ariko dira bakarrizketan Lino Gunean. Gaurtik hasi eta igande arratsera arte Makarenek hartuko dute Lino Gunea OaingozHau mugimenduaren eskutik. Osasun neurriak eta edukiera zorrotz beteta, jaien eredu alternatiboa itzali ez dadin eta kulturari bere zentzurik zabaleanean arnasa eman nahian datoz. Gaur arratsaldean hasiko dira ekitaldiak, eta igandera arte 14 bakarrizketa, ipuin kontaketa eta musika emanaldi antolatu dituzte, gustu, adin eta estilo denak ase asmoz. Bakarrizketak emango dio hasiera gaurko eskaintzari 17:30ean, Antton Telleriaren Nekatuak emanaldiarekin. Sarrerak agortuta daude emanaldirako. Ondoren helduko dira Jon Gurrutxaga & Urbil Artola 19:30ean, eta Komunetik taldearen 21:30ean emanaldiak.
Bihar, berriro, bakarrizketak hasiko du emanaldi sorta. Honakoan, Mirari Martiarena eta Idoia Torregaraik Luze edo motz bakarrizketa eskainiko dute 17:00etan. Musika eskaintza berriz, Mugan 19:00etan, Nikotina 21:00etan eta Kilimak 23:00etan osatuko dute.
Larunbatean bost musika emanaldi: Maialen Aristegi 12:00etan; Berta Pino 15:00etan; Erroka 17:30ean; Yogurinha Borova 20:00etan, eta Era BAtera 23:00etan.
Maider Galartza ipuin kontalariak ditu Makarenak azken egunean 12:00etan. Ilargi bakarlariak hartuko dio lekukoa 15:00etan; Andoni Ollokiegiren txanda izango da 17:00etan; eta Iratzar taldeak jarriko du ginga, 20:00etan.
Gaurko bakarrizketarako izan ezik, beste ekintzetarako gonbidapenak izan badira oraingoz, eta online eskura daitezke.
