Bigarren Kilometro Lezo, luzeagoa eta zabalagoa
Udako kultur eskaintzak iazkoak baino astebete gehiago iraungo du. Ekitaldien nolakotasunean ere aldaketarik bada, esparru gehiagotara zabaldu dituztelako. Lezoko sortzaileak, present.
Iazko Kilometro Lezoko irudi bat Kilometro Lezoren bigarren ekitaldia egingo dute aurten, abuztuaren 13tik irailaren 11ra arteko asteburuetan. Ostiral eta larunbatetarako hogei jarduera programatu ditu Lezoko Udalak, egun bakoitzeko bina. II. Kilometro Lezok, iazkoarekin alderatuz, astebete gehiagoko iraupena izango du.
Ekitaldi guztiak Lezo Herri Eskolako jolastoki estalian izango dira, doan. Aurretik, ordea, gonbidapena hartu behar dute interesdunek; horiek Kultura Sailaren bulegoan edo online (lezo.eus webgunean) eskura daitezke.
Ekitaldi guztien publiko muga 250 pertsonakoa izango da, musukoarekin eta eserita egon behar dute ikusleek (segurtasun distantziarekin), eta eskuak gelarekin garbitu beharko dituzte. Beraz, osasun segurtasun protokolo zorrotza izango dute emanaldi guztiek.
«Apustu irmoa»
Jesus Mari Martiarena alkateak eta Ion Pombar Kultura zinegotziak aurkeztu dute udako kultur eskaintza. Alkateak adierazi du, iaz bezala, udalak kulturaren aldeko «apustu irmoa» egiten duela, «bai urtean zehar, baita udaran ere». Hala, kulturak herriari bizia ematen diola garbi du udal agintariak.
Pombarrek, bere aldetik, adierazi du koronabirusagatik geldialdia izan zuela kulturak, eta Lezoko Udala sektoreari bultzada emateko saiakera egiten ari dela azken urtean. «Iazko ekitaldiek izandako arrakasta ikusita, aurten ere ildo beretik jarraitzea erabaki dugu», zehaztu du Kultura zinegotziak.
Pombarren ustez, kulturaren aldeko hautua udarara zabaltzea ez da ausazkoa: «Kultura indartzen eta suspertzen jarraitu nahi dugu, eta aukera bikainak ikusi ditugunez, agenda astebetez luzatzea erabaki dugu». Enfasia jarri du udal ordezkariak emanaldien egunetan (ostiraletan eta larunbatetan dira), «plan bikoitza» izango dutela lezoarrek eta hala nahi duten guztiek. Hala, emanaldi eta emanaldi artean, mokadutxoa jateko edo tragoska hartzeko aukera izan dezakete hala nahi dutenek, irailaren 11n kenduta, saioak 20:00etan eta 23:00etan direlako.
Egitarauaren barruan hainbat diziplina hartu dituzte aintzat, hala nola musika, antzerkia, zirkua (aurtengo berritasuna) eta dantza. Lezoko sortzaileek tartea izango dute: Orratx! Antzerki Taldeak, Ilargi Arrizabalaga bakarlariak, eta Tomas Garbizu Musika Eskolaren bueltan sortutako rock taldeek merezitako tokia dute ekitaldien zerrenda luzean. Kultura arduradunak nabarmendu du herriko hainbat eragileren laguntza izan dutela egitaraua osatzeko.
Egitaraua
Abuztuak 13
20:00. Mendian ibiltari izeneko familia antzerki-kantu saioa Kontukontari taldearekin.
23:00. Hika konpainiaren Tonbola antzezlana.
Abuztuak 14
20:00. Demodé Quartet taldearen kontzertua.
23:00. Hatxe bakarlari errenteriarraren kontzertua.
Abuztuak 20
20:00. Xampatito Pato taldearen Só zirku ikuskizuna.
23:00. Zen del Sur konpainiaren Orbita dantza obra.
Abuztuak 21
20:00. Ameba musika taldea.
23:00. Niña Coyote eta Chico Tornadoren kontzertua.
Abuztuak 27
20:00. Trapu Zaharra konpainiaren Por hacerte un favor antzerkia.
23:00. La Gata Japonesa taldearen Los viajes de Bowa zirku emankizuna.
Abuztuak 28
20:00. Ilargi Arrizabalaga lezoarraren kontzertua.
23:00. Anne Etchegoyen abeslariaren kontzertua.
Irailak 3
20:00. Hortzmuga antzerki taldearen Bidearen amaieran lana.
23:00. Laila Tafur dantzariaren Monstruo ikuskizuna.
Irailak 4
20:00. Ordu Txarrak, Gotzen eta Jaig Lezoko taldeen kontzertua. Tomas Garbizu Musika Eskolan sortutako rock taldeak dira.
23:00. Willis Drummomd musika taldearen saioa.
Irailak 10
20:00. Lezoko Orratx! Antzerki Taldearen Antroan intro lana.
23:00. Eztanda, Amaiur Luluaga eta Meeting Point dantzari eta dantza taldeen emanaldiak.
Irailak 11
19:00. GonaPKren kontzertua.
20:30. En Tol Sarmiento taldearen kontzertua.
