[Galeria] Kulturabirusaren azkeneko asteburua, ekitaldiz betetakoa
Besteak beste, HiruBinakako azken ekitaldiak eta Sortzaileen Azoka egin dituzte asteburuan. Bihar eta etzi, azkeneko ekitaldiak.
Bukatzear da 2021. urteko Kulturabirusa. Ostiralean HiruBinakako azken emanaldiak ikusteko aukera egon zen; larunbatean, Sortzaileen Azoka, Oiartzun urtekaria eta Mugarri bildumaren aurtengo zenbakiaren aurkezpena, eta Muski & Uzi eta Laguna taldearen kontzertua.
Oreka TX eta Myriam Perez Cazabon, Malen Elizasu eta Xabier Belaunzaran, eta Idoia Beratarbide eta Maria Mendizabal sortzaileek herrian zehar banatutako hiru agertokietan aritu ziren. Eguraldiaren iragarpena medio lokalizazioak aldatu behar izan zituzten.
Larunbatean, bestalde, Sortzaileen Azoka egin zuten egun osoz. Eguraldiak ez zuen lagundu eta Elizalde Herri Eskolara eraman zuten artisau eta artegileen merkatua, baina hamarnaka lagun gerturatu ziren bertara.
Horrez gain, aurkezpen bikoitza antolatu zuten Kulturabirusaren bultzatzaileek: kontzejupean, Oiartzun urtekaria batetik, eta Mugarri bildumaren aurtengo zenbakia, bestetik. Azkenik, Hiesaren aurkako Harri Beltza elkarteak Muski & Uzi eta Lagunak taldearen kontzertua antolatu zuen.
Bihar, Xanisteban Eguna izanik, Lartaungo txistulariek diana joko dute herri kaskoan, 09:00etan hasita. Ondoren, 11:00etan, beste hainbat musikari talde ibiliko dira auzoetan barrena.
Etzirako, Oiartzungo Feministen Asanbladak, orientazio tailerra egingo du. 10:00etan hasiko da, plazatik.
Horiek izango dira azkeneko jarduera puntualak. Puskak biltzen erakusketa hileko azken egunera arte ikusteko aukera izango da, Urdinola-Arizmendienean.
Ondokoak dira HiruBinakak eta Sortzaileen Azokak emandako irudi sorta:
