Garaipenik eskuratu gabe igaro dira azken arraun hitzorduak
Lau bandera izan dituzte jokoan Hibaikak, Trintxerpe-Illunbek eta San Juan-Koxtapek azken asteburuan; COVID-19 kasuak medio San Pedrok ezin izan du lehiaketan parte hartu.
![Banderarik eskuratu gabe igaro dira azken asteburua [Irudia: Hibaika]](https://oarsoaldea.hitza.eus/site/files/2021/08/hibaika-500x313.jpg)
Banderarik eskuratu gabe igaro dira azken asteburua [Irudia: Hibaika]
Banderarik eskuratu gabe igaro dira azken arraun jardunaldiak Oarsoaldeko traineruentzat. COVID-19 gaitza medio San Pedro ezin izan da lehiatu asteburuan. Denera, lau bandera izan dituzte jokoan bertako arraunlariek.
Hala, batetik, ETE ligan XXXVII. Ondarroako Bandera – 100 Urte Aurrera Sari Nagusia irabazteko indarrak neurtu zituzten San Juan-Koxtapeko eta Hibaikako emakumeen eskifaiek larunbatean, Ondarroan (Bizkaia). Errenteria-Oreretako ontzia hirugarren sailkatu zen, eta Pasai Donibanekoa, seigarren. Sailkapen orokorraren hirugarren postuan dago Hibaika, eta bosgarrenean, San Juan.
KAE1 ligan, bestalde, XVII. Bandera Real Astillero Guarnizo izan zuten jokoan larunbatean, Astilleron (Kantabria, Espainia) eta XII. Getariako Estropada atzo, Getarian (Gipuzkoa). San Juan-Koxtape Arraun Elkarteko gizonen ontziak bosgarren postuan bukatu zuen Kantabriako lehiaketa, eta seigarren, Getarian. Azken emaitzak sailkapen orokorraren seigarren postuan jarri ditu arrosak.
Azkenik, KAE2 ligan, Trintxerpeko Bandera lortzeko lehiatu ziren larunbatean. Etxean arraun egiten zuen Trintxerpe-Illunbek, baina hala ere, azken postuan bukatu zuen estropada. Hibaikako gizonen eskifaia bere aldetik zazpigarren sailkatu zen. Hori horrela, sailkapen nagusiaren zortzigarrena da Hibaika, eta azkena, Trintxerpe-Illunbe.
