Nabarmen behera egin dute kutsatzeek Oarsoaldean
Iragan asteburuko datuekin alderatuta zenbaki guztiek behera egin dute eskualdean, hala ere, semaforoa gorri dago oraindik lau udalerrietan.
Behera egiten ari dira kutsatzeak Oarsoaldean.
Koronabirusaren datuak hobetzen ari dira pixkanaka Oarsoaldean. Hori erakusten du Osasun Sailak pandemiaren bilakaeraren inguruan argitaratzen duen txostenak. Kutsatzeek behera egin dute lau udalerrietan, eta beraz, 100.000 biztanleko hamalau eguneko tasa metatuak eta birsortze indizeak ere behera egin dute.
Asteburuko datuei erreparatuta, hogei pertsona COVID-19 gaitzaz kutsatu dira Errenteria-Oreretan ostiraletik igandera, zortzi Oiartzunen, bi Lezon, eta bederatzi Pasaian. Guztira, 39 lagunek koronabirusean positibo eman dute hilaren 6tik 8ra Oarsoaldean.
Hori horrela, hamalau eguneko tasa guztiak 600dik jaitsi dira, eta birsortze indizeei dagokionez, besteak beste, ondokoak dira: 0,75 Pasaian, 0,67 Oiartzunen, 0,91 Errenteria-Oreretan, eta 0,75 Lezon.
Xehetasunak:
- Errenteria-Orereta. Tasa: 552,57 (hilaren 1ean igandearekin 607,33koa zen). Positiboak (ostirala-larunbata-igandea): 6-6-8.
- Lezo. Tasa: 493,42 (hilaren 1ean igandearekin 657,89koa zen). Positiboak (ostirala-larunbata-igandea): 2-0-0.
- Oiartzun. Tasa: 559,36 (hilaren 1ean igandearekin 829,40koa zen). Positiboak (ostirala-larunbata-igandea): 2-3-3.
- Pasaia. Tasa: 508,31 (hilaren 1ean igandearekin 681,74koa zen). Positiboak (ostirala-larunbata-igandea): 4-3-2.
