Lehen aldiz aurkeztuko du Pasaia Kayakek K-2 misto bat, bihar, Donostian
Larunbat goizean jokatuko dute hiriburuan Nautiko Klubaren proba klasikoa, Itsas Kayakeko Euskadiko Koparen XVI. edizioaren barruan.
Maialen Vitoria eta Iker Lizaso kadeteek bigarren esperientzia izango dute itsas probetan, lan txukuna egiteko itxaropenez. 
Bihar goizean jokatuko da Donostiako uretan hiriburuko Nautiko Klubak antolatzen duen proba klasikoa Itsas Kayakeko Euskadiko Koparen XVI. edizioaren barruan, eta bertan izango da Pasaia Kayak lehiatzeko asmoz. Talde ugaria aurkeztuko dutela aitortu dute, “garaipena lortzeko ere aukerak izateko”.
Gizonezko seniorren artean Aritz Araneta eta Lander Rodrigez izango dira pasaitarren aukera nagusiak, Txema Yarza presidenteak aitortu duenez. “Dena den, lehia estua izango da, eta itsasoa bare egotea espero denez, horrek handitu egin dezake garaipenerako lehian egongo diren palisten zerrenda”.
Donostia-Pasaia-Donostia izen klasikoarekin ezaguna bada ere, aurtengo edizioan proba Donostiako uretan jokatuko da soilik, eta 10 kilometroko ibilbidea bete beharko dute parte-hartzaileek, Nautikotik irten eta Emisarioko buiaraino joan-etorria eginda, ziaboga buian eman ondoren.
Aipatzekoa talde pasaitarrak lehen aldiz aurkeztuko duela k-2 misto bat, Eukene Saez internazional ohiak eta Iñaki Fernandez bikotekideak osatutakoa, eta taldeko kadete eta juniorrak ere bertan izango direla bakarkako lanean, klub pasaitarrak Gipuzkoako Federazioaren laguntzaz itsas modalitate hau gazteenen artean hedatzeko daraman egitasmoaren babesean.
