KAE 1. Sasoiaren bukaera: San Pedro laugarren eta San Juan seigarren
Azken sailkapenean podiumetik gertuen ibili dena Sanpedrotarra izan da. ETE eta KAE 2 ligetakoek datorren asteburuan dute finala.
Laugarren postua lortu du San Pedrok KAE 1-en. [Argazkia: Iñaki Suarez]. 
Joan den asteburuan KAE 1 Ligari bukaera eman zioten, Oarsoaldeko ordezkari gisa, San Juan Koxtape eta San Pedroko arraunlari pasaitarrek, larunbatean Plentzian eta igandean Bilbon lehiatutako estropadekin. ETE eta KAE 2 Ligek aurrera jarraitzen dute, azken hitzorduak hurrengo asteburuan izango baitituzte.
Aurtengoan ez da eskualdeko ordezkaririk izan KAE 1-eko podiumean. Gertuen ibili dena Sanpedrotarra izan da, sailkapen orokorrean laugarren suertatu delarik. Horri jarraiki, seigarren izan da San Juan-Koxtape. Ligako irabazlea Getaria izan da, bigarren Kaiku eta hirugarren Pedreña.
Sasoiko azken bi lehietan lan txukuna egin zuten pasaitarrek, postuak errepikatuz XXXII Plentziako Ikurrinagatik larunbatean, eta Villa de Bilbao estropadan, igandean. Bietan ala bietan, laugarren izan ziren moreak eta bosgarren arrosak. Bi estropada horien sailkapena, hemen.
KAE 2 eta ETE
Gizonen bigarren mailakoek eta emakumeen kategoriako kirolariek azken arraunkadak emango dituzte datozen asteburuan. Joan den honetan lortutako puntuekin (KAE 2-n Hibaika azkenurren izan zen Hondarribian, eta Trintxerpe-Illunbe azken; ETEn brontzezko domina eskuratu zuen Hibaikak Bilbon, eta laugarren izan zen Batelerak ontzia), emakumeak dira aukera garbienak dituztenak.
Hibaika hirugarren da ETE-ko 2021eko sailkapen orokorrean, eta oraindik badu aukera Deusto eta Tolosari aurrea hartu (bigarren eta lehen dira horiek, hurrenez hurren) eta brontzezko domina zilar edo urre bihurtzeko, txikia baita horien puntuen aldea gaur-gaurkoz. Aldi berean, laugarren da gaur San Juan, aurrekoekiko alde handiagoarekin bada ere.
Hona hemen KAE 1 Ligako azken sailkapena, eta KAE 2 nahiz ETE kategorietako azken estropaden puntuazioa (Hondarribia B igoerarako play-offean lehiatuko da).
KAE 1. Azken sailkapena.
| Elkartea | Puntuak | |
|---|---|---|
| 1º | GETARIA | 11,53 |
| 2º | KAIKU BEREZ GALANTA | 11,13 |
| 3º | SDR PEDREÑA | 10,93 |
| 4º | SAN PEDRO | 9,92 |
| 5º | ARKOTE URIBE KOSTA | 9,40 |
| 6º | SAN JUAN- ORERETA BERRIKUNTZAK | 8,73 |
| 7º | DEUSTO-BILBAO | 8,58 |
| 8º | DELTECO-ZUMAIA | 5,85 |
| 9º | ORIO-ORIALKI | 5,00 |
| 10º | CASTRO PRODUCHA | 5,00 |
| 11º | CAMARGO cueva el Pendo | 3,38 |
| 12º | ASTILLERO | 2,67 |
| 13º | LAPURDI-Antton Bilbao | 2,29 |
KAE 2. XV. Hondarribiko Arrantzaleen Kofradiako Bandera. Estropadako sailkapena.
| Elkartea | Denbora | ||
|---|---|---|---|
| 1º | BUSTURIALDEA | 20:53,66 | |
| 2º | DONOSTIARRA-AMENABAR | 21:00,58 | |
| 3º | ZARAUTZ-GESALAGA-OKELAN | 21:09,17 | |
| 4º | GO-FIT HONDARRIBIA | 21:12,99 | |
| 5º | DEUSTO-BILBAO B | 21:16,05 | |
| 6º | PORTUGALETE | 21:31,75 | |
| 7º | MUTRIKU | 21:34,55 | |
| 8º | HIBAIKA SUSPERREGI EDUKIONTZIAK | 21:50,09 | |
| 9º | IRC SANTOÑA | 22:30,47 | |
| 10º | ILLUNBE-FUNERARIA VASCONGADA | 22:50,48 |
ETE. Ane Aizpuru Basterretxearen I Memoriala. Estropadako sailkapena.
| Elkartea | Denbora | ||
|---|---|---|---|
| 1º | TOLOSALDEA A.K. | 10:43,40 | |
| 2º | DEUSTO-TECUNI-BILBAO | 10:47,98 | |
| 3º | HIBAIKA JAMONES ANCIN | 10:54,72 | |
| 4º | SAN JUAN-IGARTZA | 11:02,64 | |
| 5º | ONDARROA-CIKAUTXO | 11:04,20 | |
| 6º | DELTECO ZUMAIA | 11:06,38 | |
| 7º | LUTXANA A.E. | 11:14,78 | |
| 8º | ISUNTZA-ELECNOR | 11:14,80 | |
| 9º | LAPURDI | 11:41,66 | |
| 10º | CASTRO CANTERAS DE SANTULLAN | 11:55,22 | |
| 11º | ZARAUTZ-GESALAGA-OKELAN | 12:08,58 |
