Desorientatutako hainbat putre gazteren bisitak
Aleetako bat Lezon agertu zen joan den astean. Eguzki talde ekologistak azaldu du hegazti gazteak izan ohi direla, galduta, herrietan agertzen direnak.
Lezon joan den aste hasieran agertutako putrea. [Argazkia: Iker Salaberria]. 
Putrea, Tolosan.
Joan den astean Kike Amonarrizek Twitterren partekatutako bideo batek txundiduraz bete zuen sare soziala, ehunka erreakzio eta elkarrekintza eraginez. Irudietan putre bat ikus zitekeen, Tolosa erdiko balkoi baten barandan pausatuta. Harrigarriena, ordea, aurreko egunetan halako hegaztiak probintziako beste hainbat herritan ere agertu izana da.
Amonarrizen ikuskatzeak beste hainbat animatu zituen haienak ere partekatzera, eta badirudi Beasainen, kasu, halako aleren bat ere ikusi zutela bizilagunek kaleetan galduta. Lezoarren batek ere jarri zuen bere hondar alea, goialdean ikus daitekeen putre gazte hura topatu baitzuen Amonarrizek baino egun bat lehenago udalerriko errepide batean.
Eguzki erakunde ekologistarekin harremanetan jarri da HITZA bisita bitxien berri jasotzeko, eta taldeko kide den Garikoitz Plazaolak adierazi du ez dagoela anomaliarik azken egunotako gertaeretan: “Normalean ale gazteak izaten dira halakoak egiten dituztenak. Oraindik ez dute helduen praktika eta desorientatzearen ondorioz herri erdigunean bukatzen dute”.
Udako tenperatura altuek hegazti horien bisitak maizkoago egiten dituztela ere azaldu du Plazaolak, animaliek deshidratazio puntu bat ere izaten dutelako batzuetan halako geldialdi ohiz kanpokoak egiten dituztenean. “Baina hori guri ere gertatzen zaigu udan eguzkitan edan gabe ibili ostean!”.
