Urko Otegi saskibaloi jokalari pasaitarrak kantxa utzi du
40 urte bete berri dituen hegal-pibot pasaitarrak erretiroa hartuko duela iragarri du, bizi erdia baino gehiago kantxan eman ondoren.
Urko Otegi hegal-pibot pasaitarrak saskibaloi profesionala utzi eta erretiroa hartuko duela iragarri du. 40 urte bete berritan, eta bizi erdia baino gehiago kantxan lehia profesionalean eman ondoren, agur gutun bat idatzi du Otegik bidelagun izan dituen horiei esker ona adierazteko: “Eskerrik asko nirekin fidatu diren talde guztiei”.
Donostiako Askatuak klubean eman zituen lehien boteak pasaitarrak, eta 2000. urtean sartu zen bere ibilbidea gehien markatuko zuen klubean: Palencia. Talde horrekin lortu zuen, lau etapatan banatutako bederatzi denboralditan hoberena eman ondoren (2016ean), ACB Ligarako igoera.
Ordutik, bide arrakastatsua izan du hegal-pibotak, bere karrera osoan zehar bost igoera lortu dituelarik Urrezko LEB Ligatik ACB-ra. 2018-19 sasoian, Otegik aitormena jaso zuen Espainiako saskibaloiko bigarren kategoriako jokalarien artean partida gehien lehiatutako saskibaloilaria izanagatik.
Saskibaloiko euskal selekzioarekin ibilitako jokalariak honako hitzekin hasi du agur eskutitza: “Nire karrerari azkena emateko momentua heldu da. Erabaki gogorra, baina, aldi berean, asko hausnartutakoa”. Haren jarduera profesionalarekin asebete zintzilikatu ditu botak, “ongi egindako lanaren sentsazioz”, eta lan horretan pasaitarra hartu duten klubei esker ona adierazi die: “Bereziki nire etxe sentitzen ditudan Menorca eta Palenciari”.
Familia ez du ahaztu, eta horiek egin behar izandako “sakrifizio handiengatik” eskerrak eman dizkie: “Errespetu, esfortzu eta umiltasuna oinarri hezi ninduzuen. Balio horiek gabe, ez nuke lortu izango. Maite zaituztet!”. Argiro adierazi du Otegik hogei urte luzeko karreran erdietsi duen garaikur garrantzitsuena zein den: “Nire seme-alabek ni jokoan ikusi izana da trofeo handiena”.
