85 urte, Donibane kaleko Errepublikar Gunea bonbardatu zutenetik
Indar frankisten eztandak hiru lezoarri bizia kendu eta beste hainbat zauritu zituen. Etxetxo taldeak "egia, justizia eta erreparazioa" eskatu ditu.
85 urte bete dira gaur, abuztuak 26, indar frankista matxinatuen abiazio batek Lezo bonbardatu zuenetik. Eraso hautakor horretan, bonba bat jaurti zuten Donibane kaleko Errepublikar Gunean.Goizeko 09:30a aldera egin zuen eztanda gailuak, hiru lezoarri bizia kenduz: Felix Arriaga Zapirain, 56 urteko udal langilea, eguneroko lanetan ari zen bere gurditxoarekin eta zeraman behorra nahiz bera akabatu zituen bonbardaketak. Harekin batera, 21 urteko Esperanza Sein Garmendia gaztea ere hil zuten Arriagaren alboan, gurdian zaborra uzten ari baitzen bonbak lurra jo zuenean. Hirugarren hildako biktima 2 urteko Carmen Ginto Etxenike haurra izan zen, kalean jolasten zebilela harrapatu baitzuen bonbardaketak.
Hiru lagun horiez gain, beste hainbat bizilagun ere larriki zauritu zituen eztandak. Guzti horientzako “egia, justizia eta erreparazioa” eskatu ditu Etxetxo Memoria Historikoaren taldeak, erasoa publikoki gaitzetsiz.
