Itsas Kayakeko Espainiako Txapelketan izango dira pasaitarrak
Bederatzi piraguistek aurkeztuko dute etxeko ordezkaritza Castello de la Planan (Valentzia). Senior mailan "baja garrantzitsuak" dituzte.
Iker Lizaso maila ematen saiatuko da k-1eko bakarkako lanean, zein Maialen Vitoriarekin batera osatuko duen k-2an. 
Pasaia Kayak ostiralean abiatuko da asteburuan Castello de la Planan (Valentzia) lehiatuko den Espainiako Itsas Kayakeko Txapelketan onena emateko asmoz, bederatzi kirolarik osatutako ordezkaritzarekin.
Senior mailan, gizonen nahiz emakumeen kategorietan, “baja garrantzitsuak” dituztela aitortu dute klubeko arduradunek; hala ere, lau kategoriatan lehiatuko dira pasaitarrak, kadeteekin hasi, junior eta senior ordezkari banarekin jarraituz, eta master beteranoekin buka.
Aritz Araneta gizonezko seniorren kategoria nagusian arituko da. Gazteenek, aldiz, maila hartako lehen esperientzia izango dute ezagutu berri duten itsas modalitatean. Bakarkako lanaz gain, Maialen Vitoriak eta Iker Lizasok osatutako k-2 mistoa igandeko saioan lehiatuko da, eta klubean itxaropentsu ageri dira eman dezaketen mailarekin.
Master beteranoek osatuko dute taldea, eta beraiek ere seniorrek bete beharreko ibilbide bera izango dute. Larunbat arratsaldeko eguraldiaren arabera, bi aukera daude: 15 kilometroko triangelua Castelloko portuaren kanpoaldean, edo 17 kilometroko saioa Oropesatik Castello el Grauraino.
Junior eta kadeteek, aldiz, joan-etorriko ibilbide bat bete beharko dute, 15 kilometrokoa juniorrentzat eta 10 kilometrokoa kadeteentzat. Igandean jokatuko diren k-2en proba guztiek ere joan-etorriko ibilbidea izango dute, 10 kilometrokoa kategoria guztientzat.
