Pasaiako Kirol Badia Klubean izena eman daiteke jada
Lehiarik gabeko kirola egin nahi duten ikasleei aukera bat eman nahi die programak. Urritik ekainera egongo da martxan eta saioak astean bitan izango dira.
Dagoeneko eman daiteke izena Pasaiako Kirol Badia Klubean. Kideak lehiakortasunaz haragoko helburuak dituen talde baten barruan sentitu daitezen da programaren helburua, ondo pasatzeko, sasoian egoteko, kirola eta jarduera fisikoa egiteko beste modu batzuk ezagutzeko, euren denbora libre aktiboa euren kabuz kudeatzeko beharrezko ezagutzak jasotzeko…
Programa urriaren lehen astean hasiko da eta, beranduenez ere, ekainaren 15ean bukatu. Horren barruko saio eta dinamikek ordubeteko iraupena izango dute, eta astean bitan izango dira.
Ahalik eta egitarau zabalena prestatuko dute programaren baitan, udalerriaren baliabide guztiak erabiliz (publikoak nahiz pribatuak), jarduera fisikoa eta kirola sustatzen duten herriko eragileekin elkarlanean. Besteak beste, jarduera hauek guztiak egin litezke: eskalada, mendi ibilaldiak, bizikleta tailerrak, skate-scooter, hockeya, futbola, arrauna, piragua, pilota, parkourra, bela, eskubaloia, yoga…
Izen ematea eta informazio gehiago hemen klik eginda lor daiteke.
