Lezoko igerilekuak, itxita hilaren 27ra arte
Matxura baten ondorioz espero baino lehenago itxi behar izan dituzte igerilekuak. Ur jolas gunea, belardia eta spa eremua hilaren 12ra arte erabil daitezke.
Ur jolas gunea, belardia eta spa eremua hilaren 12ra arte izango dira zabalik. Azken orduko matxura bategatik eta aldi berean mantenu lanak egin behar dituztelako, Lezoko Udalak jakinarazi du gaurtik (astelehena) hilaren 27ra arte Altzateko bi igerilekuak itxita izango direla. Belardia, ur jolasen eremua, spa gunea eta hamaka zerbitzuak hilaren 12ra arte erabil daitezke, ordea. Lanek iraun bitartean Oiartzungo igerilekuak erabiltzeko aukera izango dute herriko kirol guneko bazkideek.
Urtero bi asteko itxialdia egiten dute igerilekuan. Aurten, ordea, hirukoa izango da. Izan ere egin beharreko lanak dimentsio handiagokoak izango dira: igerilekuetako baten filtroak konpondu ezin den matxura izan du, eta beraz, mantentze lanak egitearekin batera depurazio sistema berritu behar dute. Aldi berean, aurreikusi bezala, filtro guztiak berrituko dituzte.
