Lehen lehia bana berdinduz ekin dio Pasaia KE-k denboraldiari
Lagun Onak-en kontra lehiatu dute derbia Jesus Mari Zamoran. "Guztiz berriztatutako" taldea izango du aurten Pasaiak, hamalau baja izan baitituzte.
Joan den asteburuan Jesus Mari Zamoran Lagun Onak-en aurka bana berdinduz ekin dio denboraldiari Pasaia KE-k. Gipuzkoar derbira guztiz eraberritutako taldea eraman dute zuri-gorriek, aurreko urtearekin alderatuz hamalau baja izan baitituzte.
15. minutuan lortu zuen, kontraerasoan, aldeko gola sartzea Ander Saenz zuri-gorriak. Kontrako tantoa bigarren aldiari ekin berritan sartu zieten Pasaiakoei, markagailua hala mantenduz arbitroak azken txistuak jo zituenera arte.
Pasaitar arduradunek “hasiera on” iritzi diote asteburuko partidari, jakitun izanik sasoi gogorra dutela aurretik, eskarmentu handiko aurkarien kontra eman beharko baitute aurpegia hirugarren kategoria mantendu ahal izateko. Horretarako, badute estrategia argia: “Lana, ilusioa, esfortzua eta jarraitzaileen laguntza”.
