Bi domina lortu ditu Pasaia Kayakek Espainiako Txapelketan
Bi domina eta beste hiru 'top hamar' lortu dituzte pasaitarrek; lehen euskal taldea ere izan dira kluben sailkapen orokorrean.
Maialen Vitoria, Guszti Foix eta Iker Lizaso kadeteak, euren bakarkako proba bukatu ondoren, lehorreratzeko bidean. 
Joan den asteburuan Castellon (Valentzia) lehiatutako Itsas Kayakeko Espaniako Txapelketan domina bana lortu zituen Pasaia Kayakek kadete eta beterano kategorietan. Halaber, lehen euskal taldea izan da hori kluben sailkapen orokorrean.
Dominarik lortu ez bazuen ere, taldeko arduradunek nabarmendu nahi izan dute Aritz Aranetak senior maila nagusian egindako lan txukuna; 14 kilometroko ibilbidea bete behar izan zuen, seigarren postuan bukatuz lehia. Maialen Vitoria eta Iker Lizasok osatuko k-2 ontziak, kadete mailan, zilarra lortu zuen, garaileengandik 3 segundo pasatxora.
Bigarren domina Ramon Vega eta Txema Yarza beteranoek ekarri zuten etxera, hirugarren izan baitziren k-2 beteranoen proban, bigarren posturako lehia estua Pobla Marinako bikote valentziarrarekin azken metrotan galdu ondoren, kanariar uharteetako bikote irabazlearen atzetik.
Guztira, bi domina eta beste hiru top hamar lortu zituzten pasaitarrek, eta 15. izan ziren Mediterraneoko eta Kanarietako klub handiek goitik behera menderatu duten 53 talde bildu dituen taldekako sailkapenean. Lehen euskal taldea egin zituen postu horrek, Iruñeko Piraguismo Taldearen, Zumaiako Itxas-Gain Taldearen, Barrika Piraguismo Taldearen eta Hondarribiko Amuitz Taldearen aurretik, besteak beste.
