[Bideoa] Euskara ez dakitenengana hurbiltzeko ahalegina egingo dute euskaltegiek
Antxoko 'Txirrita' AEKn eta Trintxerpeko Udal euskaltegian izena eman daiteke jada. Diru laguntza bereziak abiarazi dituzte Pasaitarrek euskara uler dezaten.
Gaur goizean aurkeztu dute, Antxoko Gure Zumardian, datorren ikasturteko matrikulazio kanpaina. 
Gaur goizean aurkeztu dute, Antxoko Gure Zumardian, Pasaiako euskaltegien datorren ikasturterako matrikulazio kanpaina. Gonbidapen berezia egin diete aurten zentroetako arduradunek euskara ulertzen ez dutenei, lehen urratsa ematera anima daitezen.
“Pasaia arigune bihurtzeko” ahaleginarekin bat egin dute, topaketan, Loreto Osa Euskara zinegotziak, Antton Cuadrado hizkuntza-normalizazioko teknikariak eta Jaione Urruzola euskara teknikariak. Euskaltegien izenean mintzatu dira Udane Migeltorena, Txirrita AEK-ko zuzendaria, eta Susana Garro, udal euskaltegiko zuzendaria. Karmengo Ama eta Pasaia-Lezo Lizeoa ikastetxeetako zuzendari Juncal Olaizola eta Edurne Urkiola ere bertan izan dira, eta baita Raquel Dominguez Laurak Bat elkarteko zuzendaria ere.
Bilkurako lehen agurra Osak egin du, Hazlo tuyo! lelopean, bi euskaltegiekin elkarlanean, udalak diseinatu duen matrikulazio kanpaina aurkezteko. Antxoko AEK nahiz Trintxerpeko udal euskaltegian izena emateko epea zabalik dela iragarri du, eta gonbidapen berezia egin nahi izan die pasaitarrei “euskara ulertzera behintzat” irits daitezen.
Euskara ikasteko diru laguntzak
Horretan laguntzeko, hainbat diru laguntza abiarazi ditu udalak. Zailtasun ekonomikoak dituztenek ez ezik, euskara ulertu ez eta hastapen ikastaro batean izena ematen dutenek, esate baterako, %20 bakarrik ordaindu beharko dute ikasturte hasieran, eta eskola orduen %85etik gora joanez gero, kopuru hori ere itzuliko litzaieke ikasturtea bukatzean.
Aipatutakoarekin batera, aurreko urteetako ikastaro berezien eskaintza bere horretan mantenduko da, besteak beste, mintzamena lantzeko ikastaroak, herriko merkatarientzat zuzenean diseinatutakoak, langabetuentzako ikastaro trinkoak edota euskara online ikastekoak. Horien guztien gaineko informazioa euskaltegietara bertaratuta edo deituta eskura daiteke, honako bide hauetatik:
- Trintxerpeko Udal euskaltegia: Euskadi etorbidea, 61. Telefono zenbakia: 943 00 43 40. Posta elektronikoa.
- Antxoko AEK Txirrita euskaltegia: Zumalakarregi, 9. Telefono zenbakia: 943 52 55 45. Posta elektronikoa.
Euskara dakitenek ere jar dezakete euren hondar aletxoa aurtengo ahaleginean, postal horiek hartu eta beste norbait euskara ikastera gonbidatuz. Gonbidapen horiek etxeetako buzoietan uzteaz gain, ikastetxe eta merkatarien bidez ere zabalduko dituzte. Bideo bat ere osatu dute aurtengo berritasunen berri emateko; honakoa da:
