Lekuonarekin "anbizio falta" egotzi dio gobernu taldeari PSE-EEk
Lekuona Fabrika hizpide izan du PSE-EEk beste behin ere. Agerraldia egin dute Fabrika berriaren aurrean, ateak zabaldu eta 100 egunera haren funtzionamendua eta kudeaketaren gaineko balantzea egiteko.
Isaac Palencia PSE-EEren bozeramailea. Lekuona Fabrika hizpide izan du PSE-EEk beste behin ere. Agerraldia egin dute Fabrika berriaren aurrean, ateak zabaldu eta 100 egunera haren funtzionamendua eta kudeaketaren gaineko balantzea egiteko. Isaac Palencia bozeramaileak Lekuona erreferente bat bilakatzeko “anbizio falta” egotzi die EH Bildu eta Elkarrekin Errenteriari. Horren oinarrian, fabrika berriak ez duela kultur programazio nahikorik programatzen jarri du Palenciak, “erreferentea izateko kultur programazio askotarikoa, dinamikoa eta kalitatezkoa behar du, eta horretarako, ezinbestekoa da plan estrategiko bat izatea eskaintza fabrika osoaz gozatzea ahalbidetuko duena, lurraldearen erreferente bilakatuz eta beste kultur eragile eta instituzioekin sinergiak sortzeko”.
Palenciaren esanetan, alderdi sozialistaren kezka hori hainbat bizilagunek ere partekatzen dute, “bizilagunek harrituta galdetzen digute nola litekeen 6 urteko atzerapenarekin zabaldu eta 12 miloi euro kostatu den kultur zentroak hain ibilbide exkaxa eduki izana lehen hiru hilabete eta erdian. Lekuona inauguratu eta bi egunera, gobernu taldearen esanetara jarri zen gure alderdia proiektua edukiz eta anbizioz betetzeko lanean hasteko. Asteburutan itxita egotea ezin dugu ulertu, ezta udal web orrian bere atal berezitua ez izatea ere”.
Haien proposamenari esker asteburuetan Lekuonak ateak zabaltzea lortu dutela dio Palenciak, eta horren gainean ere kritiko azaldu da PSE-EEren bozeramailea, “asteburuetako zerbitzua azpikontratatu egin dela jakin dugulako”. Azpikontratazioaren gainera, atzera begira jarri da, eta TAO eta garabi zerbitzuaren publifikazioa ekarri du gogora, “argi dago aitzakia izan zela zerbitzuak publifikatzeko konpromisoa TAO eta garabi zerbitzuko langileak kaleratzeko. EH Bildu eta Podemosek zerbitzuak pribatizatu baino ez dituzte egin-eta ordutik”.
Programazioari dagokionean, Lekuona Fabrikako auditorioari —Sorlekua—dagokionean “hutsa” izan dela zabaldu zenetik salatu du, “Atlantikaldia eta musika bandaren kontzertuez harago ez da ezer programatu bertan”. Programatzekjo beharra eta instituzio arteko harremana lehen lerroan jarri ditu Palenciak, “garrantzitsuak dira biak Errenteriara erreferenteak diren ekintzak ekartzeko: Musika Hamabostaldia, Zinemaldia, Jazzaldia, edo Fantasiazko eta Beldurrezko Zinemaren Astea; ez soilik kultur agendan egoteko, baizik eta Lekuonari merezi duen maila altua emateko ere”.
Programatzaileei erantzun
Herritarrak kexu dira Palenciaren hitzetan, baina ez horiek bakarrik, kultur programazioaz arduratzen direnak ere kezkatuta omen daude, “ezin dute programaziorik egin Lekuonako auditorioan, ezta herriko eragileek ere, ez dagoelako datarik, ateak itxita dituztelako. Garrntzitsua da horiei ere ateak zabaldu eta programazioa aberastea”.
