Bizi osorako zigorraldien aurka elkartzera deitu du Sarek
Euskal Herri osora zabalduko du Sare Herritarrak 'Bizitza osorako zigorrik ez!' aldarria. Pasaitarrak larunbatean elkartuko dira, 12:00etan, Donibaneko Santiago plazan.
Artxibo irudia. Joan den urtean Donibanen egindako elkarretaratzea. 
Biharko Arrasaten antolatuta zuen martxa bertan behera utzi du Sarek, eta ordez, Euskal Herri osora zabaldu du bizi osoko kartzela zigorren kontra elkartzeko deia. Pasaitarrak Bizitza osorako zigorrik ez! lemapean elkartuko dira larunbatean, 12:00etan, Donibaneko Santiago plazan.
Voxek Sareren martxaren aurka antolaturiko kontramanifestazioak hautsak harrotu ditu azken egunotan. Hori dela eta, eskubideen presoen aldeko taldeak Arrasateko hitzordua bertan behera uztea erabaki du gaur bertan. Ez dira, ordea, isilduko, aldarriak herrietako plazak hartuko baititu, Deba Goienatik Euskal Herri osora.
Euskal presoentzako “bereziki” sorturiko 7/2003 legea deuseztatzea eskatu du Sare Herritarrak. Gaur-gaurkoz, hamabost dira 40 urteko espetxe zigorrak dituzten presoak.
