Pasaiako emakumeek elkarrekin korrika egiteko taldea sortu dute
Emakumeak kirolean ahalduntzeko taldea sortu du Jabetze Eskolak. "Ez duzu korrika egiteko ohiturarik izan behar. Ahalmen, nahi eta gogoa baduzu, animatu!".
Pasaiako emakumeak elkarrekin korrika egitera animatzeko taldea sortu du Jabetze Eskolak. Saiakerak helburu du emakumeak jarduera fisikoan eta kirol arloan ahalduntzea, eta emakumeen osasuna hobetzeko espazioa izango da. Sara Dorronsoro Alegria izango da prestatzailea.
Era berean, sareetan, beste emakume batzuekin batera, norberaren ahalmenak, mugak, erronkak eta zailtasunak partekatuko dituzte. “Finean, emakumeen autonomia, konfiantza eta bizitzak hobetzeko bide izan nahi du taldeak”, aitortu dute arduradunek.
Ohartarazi dute parte hartzaileek ez dutela korrika egiteko ohiturarik izan behar, aski dela “ahalmen, nahi eta gogoa” izatea. Ikasturte osoan zehar hainbat egunetan bilduko dira taldeak; norberak hautatuko du zein egunetako saioetan parte hartu nahi duen. Honakoak dira hitzorduak:
- Astearteetan 19:00etatik 20:00etara Ibaiondo pilotalekuan
- Asteazkenetan 11:00etatik 12:00etara Ibaiondo pilotalekuan
- Ostegunetan 19:00etatik 20:00etara San Pedroko udal gimnasioan
