Fernandi Olarraren omenezko kartelada egingo dute ostiralean
Balbino Saenz Olarra preso antxotarraren ama abuztuan zendu zen. Omenaldi berezia egingo dute 'Fernandi, beti gurekin' lemapean, hileroko elkarretaratzean.
Fernandi Olarra, artxiboko irudi batean.
Fernandi Olarra zenaren omenezko elkarretaratzea eta kartelada egingo dituzte datorren ostiralean, 20:00etan, Antxoko Gure Zumardian. Plaza hartan bildu ohi dira antxotarrak euskal presoen eskubideak aldarrikatzeko, hil bakoitzeko azken ostiralean, ordu berean.
Datorren ostirala, baina, berezia izango da, hitzordua probestuko baitute Balbino Saenz Olarra preso antxotarraren amaren borroka omentzeko. Joan den abuztuaren hasieran zendu zen Fernandi.
HITZAren papereko azken alean Harremantxo talde feministak hitz batzuk eskaini zizkion “herrian erreferente izan dugun emakumeari”. Balbiren ama izateaz haratago, urte luze borrokan eman zituen emakume indartsua ere izan zelako, “semearen irudia eta izena herrian zabaldu eta mantentzeko izugarrizko lana egin duena”.
Semearen espetxe zigorrak ama bera ere zigortu izana salatu du elkargune feministak, eta, hura bezala, gogora ekarri dute beste hainbat eta hainbat ama ere gaztigatzen dituela gaur-gaurkoz. Hitz batzuk Fernandiri izenburupean idatziriko gutuna, bere osotasunean, Harremantxoren Facebook orrian irakur daiteke.
