Asteklima, klima aldaketaren gainean gogoetatzeko
Asteklima iniziatibarekin bat egin du Errenteriako Udalak, eta horren barruan, klima aldaketaren gaineko hausnarketa sustatzeko hainbat ekintza antolatu ditu.
Bengoetxea, Del Amo eta Ferradas. Asteklima iniziatibarekin bat egin du Errenteriako Udalak, eta horren barruan, klima aldaketaren gaineko hausnarketa sustatzeko hainbat ekintza antolatu ditu. Horien berri, gaur goizean eman dute Jose Manuel Ferradas Ingurumen zinegotziak, Eneko del Amo Hirigintza zinegotziak eta Niko Bengoetxeak Iraunkortasun udal teknikariak.
Asteklimaren helburua, herritarrak ezinbesteko trantsizio energetiko eta klimatikoaren gainean kontzientziatu eta mobilizatzea da, eta 62 udalerritan 150 jardueratik gora egingo dituzte horrekin lotuta. Errenteria-Oreretan, hilaren 27an, astelehenarekin egin dute lehenengo hitzordua Klima aldaketaren eragin sozial eta politikoa hitzaldiarekin. Trantsizio ekologikorako eta Erronka Demografikorako Batzordeko lehendakari Juantxo Lopez de Uralde izango da hizlaria, eta gizarte kontzientziaren aldaketak aztertuko ditu, baita egungo klima krisiak zer mugimendu politiko eta legegile eragiten dituen ere. Jose Luis Caso aretoan izango da hitzaldia, Merkatuzarren, 19:00etan hasita.
Erakusketa ere antolatu dute udaletxeko arkupeetan, Klima aldaketari aurre lelopean. Hilaren 29tik urriaren 1era arte izango da zabalik, eta 18 muraletan barrena klima aldaketaren nondik norakoak azalduko ditu: eragileak, eraginak eta irtenbideak. 10:00etatik 13:00etara izango da ikusgai eta teknikari bat arituko da bertan gerturatzen direnei azalpenak ematen. Urriaren 6an Bertan kasu egin, edo banoa antzezlana taularatuko du Trokolo konpainiak. 15 urtetik gorakoentzat begirakoa da eta emanaldia Niessen auditorioan izango da, 18:00etan sarrerak online eta Niesseneko leihatilan eskuratu ahal dira.
Azken hitzordua, urriaren 15ean izango da, eta ordurako, Ibilgailu elektrikoak eta mugikortasun iraunkorrerako aukerak tailerra antolatu dute. Gaur egun merkatuan dauden ibilgailu elektrikoen ezaugarri, kontsumo, salneurri, kargatzeko errekerimendu eta bestelako alderdiei buruzko informazioa emango du, baita mugikortasun iraunkorrerako beste aukera batzuen gainekoak ere. Tailerra 18:00etan izango da Reina aretoan. Parte hartzeko beharrezkoa da aurretik izena ematea posta elektronikoz edo 628 53 22 48 telefono zenbakira deituta.
Ez da berria Errenterian energia eta klima aldaketaren gaineko lanketa. 2012an alkateen ituna sinatu ostean, 2015ean Energia Iraunkorreko Ekintza PLana onartu zuen udalak 2020rako berotegi efektuko gasak %20 murriztu asmoz 2007 urtearekiko. Horrekin batera, 2015ean Nazio Batuen Compact of Mayors iniziatibarekin bat egin eta 2019an, Klima aldaketara egokitzeko Errenteriako plana onartu zuen.
Aurten gainera, Klima eta Energia Iraunkorrerako Ekintza Planaren osaketari ekin dio udalak lurraldea —lurzoruaren okupazioa eta erabilerak—, mugikortasuna —jendearen eta merkantzien fluxua—, ekonomia zirkularra — kontsumoa eta hondakinen kudeaketa— eta energia —aprobetxamendua eta sorkuntza— arloetan eragin asmoz.
Deia ere egin diete herritarrei; “izan ere, norberak bere eguneroko ohituretan aldaketa txikiak eginez, planetaren eta bertan bizi garenon ongizatearen aldeko urratsak egingo ditugu”.
