[Galeria] Atlantikaldia lehorreratu da
Atlantikaldiak hasi du bidea. Kultur topagunea eta musika jaialdiak hamarnaka herritar bildu ditu, hori bai, segurtasun eta osasun protokoloek agintzen dutena zorrotz beteta.
Oum talde marokoarra Sorlekuko agertoki gainean. Atlantikaldiak hasi du bidea. Kultur topagunea eta musika jaialdiak hamarnaka herritar bildu ditu, hori bai, segurtasun eta osasun protokoloek agintzen dutena zorrotz beteta. Herrixkan, txikienei begirako emanaldia egin du Ene Kantak taldeak 18:30ean hasita, eta dantzan jarri ditu guztiak. Txalupek ere, bi zehazki, Oiartzun ibaian barrena egin dute bidaia Zumardiraino, eta Itsasargi Nagusiak, lehenengo kontzertu handia hartu du gaur: Marokoko Oum taldea eta Alos Quarteten arteko itsas elkarrizketa. Eserlekuak batean zein bestean beteta.
Aizpea Otaegi alkateak ez du hutsik egin Itsasargi nagusiko lehen hitzorduarekin, eta aurpegi ezagun bat gutxienez utzi du gaurko emanaldiak, Fermin Muguruza musikari irundarra publikoaren artean izan da.
Sarrerarik lortzerik izan ez dutenek aukera dute oraindik ere, ekitaldi bakoitza hasi baino ordu erdi lehenago lekuan bertan gonbidapenak lortzeko, udalak gonbidapenen %30 gorde baitu horretarako. Gaur bi emanaldietan horren adibideak izan dira eta sarrera ez zuen jendeak bertan lortu du unean emanaldietarako. Gonbidapenekin lotuta, arduraz jokatzeko deia egin dute antolatzaileek, eta azken unean ekitaldira ez joateko erabakia hartzen dutenei jakinarazteko eskatu dute, gonbidapen horiek beste pertsona batzuk erabil ditzaten.
