Kultur eztanda gaurtik Errenteria-Oreretan
Sarrerarik lortzerik izan ez dutenek aukera dute oraindik ere, ekitaldi bakoitza hasi baino ordu erdi lehenago lekuan bertan gonbidapenak lortzeko, udalak gonbidapenen %30 gorde baitu horretarako.
Txalupen igoerak irudi ederra utziko du gaur ere, Oiartzun ibaia Atlantikaldiaren ardatz bilakatuta. Iparrorratzak Errenteria izango du jomuga gaurtik eta igandera arte. Ez da musika eta kultur zaleek desioko luketen tamainakoa izango sobera ezagunak diren arrazoiengatik, baina Atlantikaldiak ihesbiderako eta kultura letra larriz gozatzeko aukera eskainiko du gaurtik igandera arte. Gaur goizean hasiko dira muralari forma ematen Miguel Irastorzan kokatutako Kalekaian, eta Itsasargiak, Lekuona Fabrikaren Sorlekuak, kartel buruen lehen kontzertua hartuko du: Marokoko Oum taldea eta Alos Quartet-en arteko kolaborazioa izango da, edo itsas elkarrizketa. Aurretik jaialdiak itsasoarekin duen harremana irudikatzeko, Oiartzun ibaia bilakatuko da urtero gisa protagonista txalupen igoerarekin (19:00etan).
Herrixka, Ontziola eta Plazan ere atondu dute eskaintza Musika jaialdiaren eta kultur Topagunearen lehen egunerako, publiko anitzari begira.
Jendearen erantzunak argi utzi du kultur gosea izan badela, musika emanaldi eta ekintzetarako; pasa den ostiralean zabaldu zuten gonbidapenak eskuratzeko epea —%70— eta lehen hamar minutuan agortu ziren. Lasaitasunerako deia, ez dago-eta dena galduta. Sarrerarik lortzerik izan ez dutenek aukera dute oraindik ere, ekitaldi bakoitza hasi baino ordu erdi lehenago lekuan bertan gonbidapenak lortzeko, udalak gonbidapenen %30 gorde baitu horretarako. Gonbidapenekin lotuta, arduraz jokatzeko deia egin dute antolatzaileek, eta azken unean ekitaldira ez joateko erabakia hartzen dutenei jakinarazteko eskatu dute, gonbidapen horiek beste pertsona batzuk erabil ditzaten.
Gaurko egitaraua, hemen:
- Goizean zehar: Kalekaian (Miguel Zabaletako futbito zelaian) muralaren sorkuntzaren hasiera.
- 17:00etatik-19:00etara: Ludoteka tailerrak Herrixkan (Fanderia).
- 17:00etatik 18:00etara: Bisita gidatua Plazatik abiatuta (Herriko Plaza).
- 18:30etik 19:30era: Ene Kantak Herrixkan (Fanderia).
- 18:30etik 19:00etara: Bisita gidatua Plazatik abiatuta (Herriko Plaza).
- 19:00etan: Txalupen igoera Oiartzun ibaian.
- 19:30etik 21:00etara: Oum+Alos Quartet Itsasrgi Nagusian (Lekuona Farikan).
