Euskaraz ikastea gozagarri egingo duen sarea
Bilera antolatu du ostegunean (hilak 30) Xenpelar Etxean 17:30ean, eta interesa izan dezaketen elkarte eta norbanakoak parte hartzera deitu ditu.
Eskolan ikasitakoari etxean segida ematea labirinto bilakatzen da hainbat ikaslerentzat. Ez dute horietako batzuk ingurune euskaldunik etxeko lanetan lagunduko diena, eta horrek, zalantzarik gabe, zaildu egiten die jarduna. Horri irtenbidea eman nahirik lanean hasi zen Lau Haizetara Euskaltzaleon Topagunea, eta Elkarrekin Ikasiz iniziatiba martxan jarri behar hori zuten ikasleen prozesua laguntzeko, Errenteriako Udalarekin elkarlanean.
Programak helburu garbia du: euskararekin zailtasunak dituzten lehen hezkuntzako ikasleei makulutxoa eskaintzea, euskararen barnako bidea gozagarriagoa izan dadin haientzat. Hori lortzeko baina, eta beharra duten guztiei erantzun ahal izateko, ezinbestekoa zaie antolatzaileei herritarren laguntza, boluntarioen sare zabala osatzea beharrezkoa delako inor bazterrean ez uzteko.
Horri begira, bilera antolatu du ostegunean (hilak 30) Xenpelar Etxean 17:30ean, eta interesa izan dezaketen elkarte eta norbanakoak parte hartzera deitu ditu. Informazio gehiago jaso edota izena eman nahi dutenek boluntario gisa, galdetegia bete dezakete.
