"Alkateak dituen asmoen berri informatzeko" bilduko dira antxotarrak
Antxok laburki jasango dituen aldaketen gainean ezinegona partekatzeko bilera egingo dute astelehenean kultur etxean. Ez dute azokarik nahi Biteri plazan.
2009an egindako herri kontsultan, antxotarrek erabaki zuten ez zutela Biteri plazan eraikin berririk nahi. 
Datorren astelehenean, 19:00etan, herri batzarra deitu du EH Bilduk, antxotarrekin elkarlanean. Kultur etxean elkartuko dira Antxok epe laburrean jasango dituen aldaketa urbanistiko nahiz sozialen gainean hausnartzeko. Zehatzago, “alkateak dituen asmoen berri informatzeko” deitu dute bilerara.
Hainbat antxotarrek esan dutenaren arabera, Izaskun Gomezek Eusko Trenbide Sarearekin (ETS-Euskotren) hitzarmen bat sinatzeko intentzioa dauka, erakunde horrek egungo azoka (topoaren lurperatzeagatik eraitsiko dutena) ordezteko instalazio berri baten eraikuntza finantzatu dezan.
Eraikin berri hori Biteri plazan sortu asmo dute; zehazki, elizari itsatsita. Asmo horrekiko gaitzespen irmoa erakutsi dute deitzaileek sare sozialen bidez: “Argi gelditu zen, orain urte batzuk, [2009an egindako parte hartze prozesuaz ari dira], udalarekin adostuta, Biteri plazan eraikitzeko edozein asmo baztertuko zela; eta orain alkateak horri entzungor egingo dio, Luzuriagako eraikina baliagarri duen bitartean”
Hainbat lagunek kexarekin bat egin dute sareetan, frontoi zaharra baita “gure haurrek aisialdirako eta kirola egiteko duten gune bakarrenetakoa”. Gaur egun ere gazteei espazio hori txiki geratzen zaiela uste dute, eta beraz, “lotsagarritzat” jo dute are gehiago mugatu nahi izatea zonaldea.
