Martxan da VIII. OrriBakaR lehiaketa
Orri bakarreko sorkuntza literario lanak azaroaren 19ra arte aurkez daitezke. Sarien banaketa abenduaren 10ean egingo dute, Andreonen.
2019ko sari emate ekitaldikoa da ondoko argazkia. 2020an ezin izan zen egin. Andreone Udal Liburutegiak martxan du 2021eko OrriBakaR literatur lehiaketa. Zortzigarren ekitaldia du aurtengoa Azaroaren 19ra arte aurkez ditzakete lanak partaideek, baldintza orokor batekin orri bakarrekoak behar dute izan lanek. Liburutegian eman behar dira lan horiek.
Aurreko urteetan bezala, adinaren araberako bost maila daude:
- A maila: 6-7 urtekoena.
- B maila: 8-9 urtekoena.
- D maila: 10-11 urtekoena.
- E maila: 12-13 urtekoena.
- F maila: 14-15 urtekoena.
Lanek euskarazkoak izan behar dute, eta edozein genero literario izango da onartua: bertsoguntza, olerkigintza, ipuingintza, kazetaritza, komikigintza… Gaia librea da, eta argitaragabeak izan behar dute sormenek. Partaideak Lezoko biztanle, edo udal liburutegiko bazkide izatea derrigorrezkoa da.
Lanak entregatzeko, gai hauek hartu behar dituzte kontuan partaideek: orriaren goiko aldean izenburua idatziko da. Lan bakoitzeko gutunazal itxi bat aurkeztuko da; gutunazalaren kanpoko aldean lanaren izenburua eta egilearen adina, eta barruko aldean: helbidea, eta telefonoa eta izen-abizenak. Lana kanpoan joango da, eta gutunazala lanari grapaz josita. Ikastetxearen izena dakarren lanik ez da onartuko.
Sari banaketa abenduaren 10ean egingo dute, 19:00etan eta liburutegian bertan (iaz ezin izan zen egin sari banaketa ekitaldia). Hala, antolatzaileek izendatu duten epaimahaiko kideek erabaki behar dute maila bakoitzeko zein bi lani eman saria. Beraz, orotara, hamar sari banatuko dituzte (bi mailako): liburuak erosteko 100 euroko baleak dira sariak. Gerta liteke, ordea, epaimahaiak sariren bat eman gabe uztea aurkeztutako lanek behar adinako maila ez izateagatik.
