Bizitza duinen aldeko aldarria kalean da berriro
Udako oporraldiaren ondotik, berrartu dute kaleetako aldarrikapen dinamika Errenteria-Oreretako jubilatu eta pentsiodunek.
Duintasunaren elkarretaratzea gaur. Udako oporraldiaren ondotik, berrartu dute kaleetako aldarrikapen dinamika Errenteria-Oreretako jubilatu eta pentsiodunek. Hileko lehen asteleheneko elkarretaratzeak oporretan izan badira ere, beraien aldarriak ez du etenik izan, eta hitzaldiak ere antolatu dituzte tartean.
Gaur, baina, berriro kalera itzuli dira,. Hori da euren bozgorailua, bizitza duinen aldeko aldarria egiteko eremuetako bat. 11:00etan bildu dira hamarnaka pentsiodun Herriko Plazara eta bertan orain gutxi egin duten Bruselarako martxan egindako eskaerak ekarri dituzte gogora. Zazpi dira guztira. Europar Batasunaren oinarrizko eskubide gisa blindatzea euren belaunaldiari eta etorkizunekoen pentsio publikoak, bidezkoak eta nahikoak; bermatzea bizi baldintza duinak eta autonomoak lortzeko bitartekoa. Pentsio publikoen sistema eta pentsio duinak bermatzea, eta helburu hori Europako funtsen banaketan lehenestea. Beste eskaera bat, Europako Gutun Sozialaren exijentzia indartzea, pentsio eta soldata minimoetan herrialde bakoitzaren batez besteko soldataren &60 bermatzeko, eta pentsioen errebalorizazio automatikoa bermatzeko, gutxienez benetako KPIaren arabera. Diru sarrera horien finantzaketa eta zerbitzu soziosanitarioen eta mendekotasuna artatzeko kalitatezko arreta emateko zerbitzuen unibertsaltasuna bermatzea.
Halaber, Europako funtsak sortzea, arestian aipatutako helburu horiek lortzeari lehentasuna ematea eskatu dute, eta PEPPak —Pan-European Personal Pension Product— sustatzen dituen araua indargabetzea.
Azken eskaera zerga ordainketa saihestea eta zerga paradisuekin amaitzeko neurri eraginkorrak har ditzaten izan da, “kreditua eta aurrezpena sozializatzea, finantza erakunde publikoen garapena sustatuz”.
Gaurko elkarretaratzean, bolo-bolo dabilen beste gai bati egin diote tartea pentsiodunek; izan ere, gizarte osoari eragiten dion kontua bada, diru sarrera baxuenak dituztenei eragiten die gogorren: argindarraren prezioa.
Batzarra amaituta, ohi bezala, manifestazioa egin dute pentsio publiko eta duinak bermatzeko exijitzeko. Bidea argi dute, “borrokatzea da” eta horretan jarraitzeko borondate irmoarekin itzuli dira kalera.
