VI. Kirol Astea egingo dute hilaren 16tik 22ra
Maiatzean egitekoak ziren aurtengo Kirol Astea, baina atzeratu egin behar izan dute. Dozena erdi ekitaldi egingo dituzte, tartean Kirol Saria eman.
Aritz Ganboaren 'Bideak' dokumentalaren emanaldi eta ondorengo solasaldiarekin hasiko da VI. Kirol Astea. Hilaren 16tik 22ra bitartean Oiartzungo VI. Kirol Astea egingo dute. Berez maiatzean egitekoa zen, baina atzeratu egin zuten. Osasun larrialdi egoera zertxobait arinduta, urrian egitea erabaki dute. Kuriositatez, pandemiaren aurretik normaltasunez egin zen azken ekitaldietako bat izan zen.
Dozena erdi ekitaldi antolatu dituzte. Dokumentalek, solasaldiek, hitzaldiek zein mahai-inguruek osatuko dute egitaraua.
Kirol Sariaren banaketa ekitaldiarekin bukatuko dute VI. Kirol Astea. Aurtengoa zein izango den aurreratu dute: Guruzne Azpiroz arraunlari eta entrenatzaile ohia.
Saio guztiak udaletxeko areto nagusian izango dira, Labore Oarson izango dena kenduta. Edukiera muga %100era bueltatuko da.
Egitaraua
- Hilak 16, larunbata: Bideak dokumentala eta solasaldia Aritz Ganboarekin (udaletxeko areto nagusian, 17:30ean).
- Hilak 18, astelehena: Kirol elikadurari buruzko mahai-ingurua: Nerea Abancens Napo, Martxel Bereau eta Idoia Larrañaga (Labore Oarson, 18:00etan).
- Hilak 19, asteartea: Hijas de Cynisca dokumentala (udaletxeko areto nagusian, 18:30ean).
- Hilak 20, asteazkena: Intentsitate handiko aldizkako kiroletan entrenatzeko metodologia: Eliteko futbol-talde baten entrenamenduaren azterketa hitzaldia, Iñaki Tolosarekin (udaletxeko areto nagusian, 19:00etan).
- Hilak 21, osteguna: 6.000 metroan dokumentala eta solasaldia Felipe Uriarterekin (udaletxeko areto nagusian, 19:00etan).
- Hilak 22, ostirala: Oiartzungo VI. Kirol Saria: Guruzne Azpiroz Ibarguren (udaletxeko areto nagusian, 19:00etan).
