2022ko udal-tasa eta zergak izozteko proposamena onartu dute
Aurreko urtean egindako bidetik, datorren urteko Zerga Ordenantzen aldaketa behin-behinean onartu dute. Alde egin du Podemosek, eta EH Bildu abstenitu da.
Pasaiako udalbatza, atzo udaletxean eginiko osoko bilkuran. 
Bigarren urtez jarraian, udal-tasa eta zergak izozteko behin-behineko proposamena onartu zuten atzo egindako ezohiko udalbatzarrean. Izaskun Gomezek hainbat egun lehenago iragarri zuen sare sozialetan Zerga Ordenantzei buruzko gaia mahaigainean egongo zela hurrengo plenoan, eta orduantxe onartu zuten.
Ahal Dugu-Podemoseko Julen Rodriguezek alde bozkatu zuen bere alderdiaren izenean, aurreko urteko erabakia errepikatuz. Zergatia azaldu zuen: “Lehen aldia da, bai aurreko legealdian bai honetan, udal gobernu honen Zerga Ordenantzen alde bozkatuko duguna. Izan ere, aurreko urteetan tasak igo diren moduan, joan den urtean eta aurten, pandemiagatik, horiek izoztea erabaki baita”. Gaineratu zuen ahalegin bat egingo dela 2022an saiakera ekologistak martxan jartzeko, eta horren alde ere agertu zen.
EH Bilduk, ordea, abstentziora jo zuen. Positiboki baloratu zuen koalizioak zerga eta tasak izoztea birusaren testuinguruan, “horregatik ez dugu aurka bozkatuko”, baina hobekuntzarako tartea badela aitortu zuen Iraitz Pazosek: “Uste dugu badagoela tasa hauen gehikortasuna hobetzeko tartea, alegia, gehien duenari gehiago kobratzeko”.
