6.000 euro bildu ditu Sport Mundik Mindararentzat
Uztailean golf txapelketa antolatu zuten, eta tokiko elkarte bat bilatzen ari zirela bildutako dirua emateko azaldu du Garciak: "Inguruan, Mindara elkartea ezagutzen duen pertsona bat dugu, eta elkarteak bat egiten duenez gure balio eta irizpideekin berau aukeratu genuen".
Sport Mundi eta Mindara elkarteetako ordezkariak gaur arratsaldean dirua jasotzeko unean. Hondarribiko Sport Mundi irabazi asmorik gabeko elkarteak, 6.000 euroko txekea eman dio gaur Mindara elkarteari. Sport Mundiko Juanan Garcia eta Manu Amunarrizek Mindara elkarteko erabiltzailea den Ane Asensiori eman diote 6.000 euroko txekea gaur arratsaldean Mindararen egoitzaren kanpoko aldean. Txema Olazabal golf jokalaria da Sport Mundi elkarteko lehendakaria eta kirol ekitaldiak antolatzen dituzte, bildutako dirua arlo ezberdinetan ari diren elkarteei emateko.
Oraingoan Mindara elkartea, Aniztasun Funtzionala duten Gipuzkoako pertsonekin lanean diharduen elkartea izan da hartzailea. Uztailean golf txapelketa antolatu zuten, eta tokiko elkarte bat bilatzen ari zirela bildutako dirua emateko azaldu du Garciak: “Inguruan, Mindara elkartea ezagutzen duen pertsona bat dugu, eta elkarteak bat egiten duenez gure balio eta irizpideekin berau aukeratu genuen”.
Antolatzen dituzten kirol ekitaldien artean, Hondarribiko San Silbestre lasterketa aipatu du Garciak, “bi urte daramagu antolatu gabe, eta espero dugu aurten aukera izango dugula”.
Jose Luis Asensio Mindarako lehendakariak esker ona adierazi die Sport Mundiko bi ordezkariei: “Dirua oso ondo etorriko zaigu eta elkartean martxan ditugun programa guztietara bideratuko dugu, elkartearen beharrak asetzera”. Elkarteak diru iturri mugatuak dituela zehaztu du Asensiok, “beraz, halako sorpresak ongi etorriak dira, aurrekontuak orekatzeko oso garrantzitsuak direlako”.
Une honetan 70 erabiltzaile ditu Mindarak, gehienak adin txikikoak dira, baina kirol egokituan ari diren helduak ere badira, “urtetik urtera handitzen goaz, gero eta erabiltzaile gehiago ditugu”.
