Garmendi txokolategiak bat egin du ZOGIonak kanpainarekin
"Produktua balioan jarri eta sektore honetarako profesionalen lana ikusarazi eta zabaltzeko" asmoz, dastaketak, zozketak eta bestelakoak egingo dituzte bihar, Ogiaren Nazioarteko Egunean.
Okindegietan ere euskaraz aritzea bultzatu nahi dute lehiaketarekin Biharko (hilak 16) Ogiaren Nazioarteko Egunean Gipuzkoa Okinak Elkarteak kanpaina berezia egingo du lurraldeko hainbat okindegitan, tartean Oiartzungo Garmendi txokolategian. “Produktua balioan jarri eta sektore honetarako profesionalen lana ikusarazi eta zabaltzeko” asmoz, dastaketak, zozketak eta bestelakoak antolatu dituzte. ZOGIonak lemapean egingo dute kanpaina eta guztira 38 okindegik parte hartuko dute.
Bada, bihar Garmenditik pasatzen direnek opiltxoak edo gozokiak jasoko dituzte opari. Horrez gain, egun bakoitzeko ogi bat aurkeztuko du egitasmoan parte hartuko duten okindegi guztiek, eta bezeroek dastatzeko aukera izango dute. Gainera, erosketak egiten dituztenen artean zozketa bat egingo dute. Etzi (igandea) egingo dute zozketa hori; Oiartzungo txokolategian bost irabazle egongo dira. Hurrengo astean zehar oparitxo bat jasoko dute saridunek.
Bestalde, zorion txartelak biltzeko kutxa bat ere jarriko dute txokolategian, bezeroek nahi dutena idatz dezaten. Originalenak aukeratuko dituzte, hiru guztira, eta irabazle horiek landa turismo batean asteburu bat irabaziko dute.
