Hizkuntzak solasean jarri dituzte uhinetan barrena
Katalanez, euskaraz, erromaniaz, ukranieraz, arabieraz, woloferaz... aritu dira, bakoitza berean, norberaren errealitatea besteei erakutsi eta jendartean zabaltzeko.
Hikzuntzak solasean irratsaioa egin dute Lekuona Fabrikan. Hamaika hizkuntzek egiten dute bat Errenteria-Oreretan. Hamaika hizkuntz, hamaika kultura eta hamaika komunitate. Horien erakustaldi bat egin dute gaur Lekuona Fabrikan, hamalau komunitateko hamalau hiztun mahaiaren bueltan jarrita irratsaio baten aitzakiapean. Gidaritza lanetan Pausumediako Aitziber Zapirain; Antxeta irratiko esataria da Zapirain, eta berak euskaraz gidatu du saioa.
Katalanez, euskaraz, erromaniaz, ukranieraz, arabieraz, woloferaz… aritu dira, bakoitza berean, norberaren errealitatea besteei erakutsi eta jendartean zabaltzeko. Beraien hizkuntza nola bizi duten, transmisiorik ba ote dagoen, etxetik ateratzea duten… bakoitzak berea kontatu du. Izan ere, bertan dira, espaloi eta kale kantoietan bat egiten dute, baina oharkabean joaten dira. Hizkuntza horiei guztiei, hiztun eta komunitate horiei, udalerriaren paisaia aberasten dutenei, aitortza izaten ari da gaurko iniziatiba hori.
Atzean, Hizkuntzak Solasean Taldea dago, eta oinarrirago, Errenteriako Udalak duela urte batzuk abiatutako Hizkuntzen Topagunea.
Hizkuntza aniztasun hori ikusgai egiteko urrats bat gehiago izan da gaurkoa, ez lehena, ezta azkena ere. Momentuz hamalau hizkuntz komunitate ordezkatu dituzte gaurko saioan, baina herrian diren guztiak Hizkuntzak Solasean taldera biltzea nahi dute parte hartzaileek; bakoitzak berean asko duelako eskaini, eta esateko.
-
- Hizkuntzak Solasean irratsaioa
