Astebetean, sei COVID-19 kasu Oarsoaldean
Horietatik bost Errenteria-Oreretan jaso dituzte osasun zerbitzuek, eta bat Pasaian. Lezoko eta Oiartzungo 100.000 biztanleko tasa zerokoa da.
Hilaren 11tik 17ra (joan den astelehenetik atzora arte), Oarsoaldeko lau herrietan COVID-19agatik sei herritar gaixotu dira, bost Errenteria-Oreretan eta bestea Pasaian. Epe horretan ez da kutsaturik izan ez Oiartzunen ezta Lezon ere.
Eusko Jaurlaritzako Osasun Saila astero hasi da koronabirusaren eraginaren gaineko datuak ematen, lehen egunero ematen zituen. Gaur publikatu duen txostenaren araberakoak dira albiste honetako datuak.
Tasei dagokienez, oso baxu daude Oarsoaldean. Errenteria-Oreretako azken hamalau egunetako 100.000 biztanleko tasa 37koa da, eta Pasaiakoa 17koa (hilaren 10ean 27koa eta 23koa zen bi herri horietako tasa hurrenez hurren). Lezo eta Oiartzungo tasa, berriz, zeroan dago: azken hamalau egunetan ez dute positiborik jaso bi herri horietan.
