'Hackerrak', umorez eta musikaz betetako antzezlana, igandean
Oiartzungo antzerki programazioaren bigarren saioa izango da hilaren 24an. Nomofobikak taldearen antzezlana ikusteko aukera egongo da.
Patxi Perez, Olatz Beobide eta Belen Cruz aktoreek jokatzen dituzte paperak. Oiartzungo Antzerkizaleen Elkartearen programazioaren bigarren saioa datorren igandean —hilak 24— izango da. Nomofobikoak antzerki taldearen Hackerrak antzezlana ikusteko aukera izango da. Ohi bezala, udaletxeko plenoan taularatuko dute, 19:00etan hasita.
Olatz Beobide, Belen Cruz eta Patxi Perez izango dira aktoreak, eta musika eta umorez betetako saioa izango dela hitz eman dute.
Sarrerek bost euroko prezioa izango dute. Edukiera pandemia hasi baino lehenagokora bueltatu denez, sarreren salmenta ere hala izango da. Saioa hasi baino lehen salduko dituzte, udaletxean bertan.
Sinopsia
Oraingoan unibertso zabalago bat dugu aurrean: Robotika, adimen artifiziala, datuen lapurketa masiboa, cookie-ak eta algoritmoak.
Gure bizimodua egunetik egunera aldatuz doa: gure lana robotizatzen hasi dira, gure harremanak aldatzen doaz, etxeko entretenimendua gorantz doa eta GAFA (Google, Apple, Facebook eta Amazon) bezalako sare eta plataformek komertzio txikia ordezkatu dute. Iraultza baten hasieran gaude: laugarren Industria iraultza. Gizateriak inoiz bizi ez duen hori, abiada bizian dator orain.
