Juanito Mitxelenaren omenezko bertso saioa egingo dute igandean
Mitxelena zenarekin bertso tarteak partekatu zituztenak igoko dira oholtzara: Amets Arzallus, Sustrai Colina, Maialen Lujanbio, Miren Artetxe eta Josu Ibarguren.
Juanito Mitxelena, aurrez aurre, eskuinetik hasita lehenengoa, Karrikako Artaso elkarteko bertso eskolan. Hilaren 25ean beteko dira bi urteko Juanito Mitxelena (Oiartzun, 1953-2019) bertsolaria hil zela. Oiartzungo Bertso Eskolak eta udalak hura gogorarazteko bertso saioa antolatu dute iganderako. Elizalde Herri Eskolako pilotalekuan izango da, 17:30ean hasita.
Amets Arzallus, Sustrai Colina, Maialen Lujanbio, Miren Artetxe eta Josu Ibarguren jarriko dira mikrofonoaren aurrean, Alaia Martinek jarritako gaiekin bertsoak osatzeko.
Ikastetxeko pilotaleku estalian jarriko dituzten ehun eserlekuak bete arte izango da bertso saioaren edukiera.
Bertsolaria eta eragilea
Mitxelena Karrikako Oiantzabal baserrian jaio zen, eta bertsolari eta bertso eragilea izan zen. Alaia Martinek berak gogorarazi duenez, ironia fineko bertsolaria zen, errima zorrozduna.
“Eskuzabala, umila, lotsatia eta jatorra zen. Kariñoa genion, baita begirunea ere; erreferentzia zen guretzat”, gaineratu du igandean gai-jartzaile lanetan arituko denak.
Bertsotan aritu eta bertso eskolan parte hartzeaz gain, bere auzoko Artaso elkartea bertsoetarako aterpe bihurtzen zuen. “Otorduak antolatzen zituen, bertsotan entrenatzeko edo gozatzeko”. Modu horretan, igandean arituko diren gehienek ongi baino hobeto ezagutzen dute Karrikako txokoa.
Horrez gain, Oiartzungo bertso munduan ibiltzen direnek urtero xanistebanetan egiten zen bertso afarira ez zuen hutsik egiten Mitxelenak.
Seme-alabei ere transmititu zien bertsozaletasuna. Karmele alaba ere bertsotan aritua dela nabarmendu du Martinek, eta aitari ikasi zizkiola bertsokera fina zein errima zorrotzak.
Mahaiaren bueltan egindako bertso saioak nahiago zituen Mitxelenak, nahiz eta Gipuzkoako zein Oiartzungo txapelketetan probatu zuen. “Saio arrunta izango da oro har baina Juanitorekin lotutako keinuak izango dira”, iragarri dute.
